Պատժամիջոցների թուլացման մասին Ռուսաստանի պահանջը ԵՄ-ին ստիպում է կանգնել բարդ ընտրության առաջ. Euronews

Որպես Սևծովյան նախաձեռնության վերականգնման պայման՝ Ռուսաստանը պահանջել է, որ «Ռոսսելխոզբանկը» կրկին միանա SWIFT համակարգին, որը ԵՄ իրավասության ներքո է:

Վերջին շաբաթների ընթացքում եվրոպացիները դժգոհել են, որ իրենց թույլ չեն տալիս մասնակցել Ուկրաինայում պատերազմը դադարեցնելու վերաբերյալ ընթացիկ բանակցություններին, իսկ ԱՄՆ պետքարտուղար Մարկո Ռուբիոն վստահեցրել է, որ նրանք կհրավիրվեն բանակցությունների սեղանի շուրջ, երբ գա պատժամիջոցների ապագան քննարկելու ժամանակը: Այդ հրավերը կարող է ստացվել ավելի շուտ, քան սպասում էր Բրյուսելը, գրում է Euronews-ը։

Սաուդյան Արաբիայում բանակցությունների նոր փուլից հետո ԱՄՆ-ը հայտարարել է, որ Ռուսաստանն ու Ուկրաինան պարտավորվել են մասնակի հրադադար պահպանել «էներգետիկ օբյեկտներում», ինչը զգալիորեն զիջում է լայն հրադադարին, որը պնդում էր Դոնալդ Թրամփը: Կողմերը նաև պայմանավորվել են «Սև ծովում ապահովել անվտանգ նավագնացությունը, բացառել ուժի կիրառումը և կանխել առևտրային նավերի օգտագործումը ռազմական նպատակներով», ասվում է ԱՄՆ-ի հաղորդագրության մեջ: