Ուկրաինայում ընդդիմության առաջնորդները բացառել են ընտրությունների անցկացումը պատերազմի ժամանակ
Ամերիկյան լրատվամիջոցները հաղորդում են, որ Թրամփի վստահված անձինք գաղտնի բանակցություններ են վարել Ուկրաինայի ընդդիմադիր քաղաքական գործիչներ Պյոտր Պորոշենկոյի և Յուլյա Տիմոշենկոյի թիմերի միջև՝ երկրում նախագահի ընտրությունը հնարավորինս շուտ անցկացնելու վերաբերյալ: Երկու քաղաքական գործիչներն էլ բացառել են նման քայլը։ «Մեր թիմը միշտ կտրականապես դեմ է եղել պատերազմի ընթացքում ընտրությունների անցկացմանը և շարունակում է հավատարիմ մնալ այս դիրքորոշմանը»,- ասել է Ուկրաինայի նախկին նախագահը։
Պյոտր Պորոշենկոն, որն Ուկրաինայի նախագահի պաշտոնը զբաղեցրել է 2014-2019 թվականներին, ընդգծել է, որ ընտրությունը կարող է տեղի ունենալ միայն այն դեպքում, եթե լինի զինադադար, և խաղաղ համաձայնագիր ստորագրվի Ուկրաինայի անվտանգության երաշխիքներով։
Իր հերթին Յուլյա Տիմոշենկոն, որը երկու անգամ եղել է Ուկրաինայի վարչապետ և գլխավորում է «Բատկիվշչինա» կուսակցությունը, ասել է, որ իր թիմը բանակցություններ է վարում «բոլոր դաշնակիցների հետ, որոնք կարող են հնարավորինս շուտ ապահովել արդար խաղաղություն»։ Մինչ այդ պահը, ընդգծել է նա, «Ուկրաինայում ընտրության անցկացումը բացառվում է»։
Ներկայումս Ուկրաինայում ընտրությունների անցկացումն արգելված է ռազմական դրության պատճառով։
