Անձրևի տակ և առանց հոլիվուդյան հայտնիների. Վենետիկում սկսվում է 80-րդ կինոփառատոնը
Հեղեղումների սպառնալիքի և Ամերիկյան դերասանների գիլդիայի սահմանափակումների պայմաններում Վենետիկում մեկնարկում է հոբելյանական 80-րդ կինոփառատոնը:
Չորեքշաբթի՝ օգոստոսի 30-ին, անձրևոտ Վենետիկյան Լիդոն պատրաստվում է հյուրընկալել տարբեր երկրների դերասաններին, ռեժիսորներին և հյուրերին:
«Օսկարի» մեկնարկային հարթակ համարվող Վենետիկյան կինոփառատոնը բացում է իր դռները՝ շատ սպասված ֆիլմերի համար, սակայն այս տարի սովորականից ավելի քիչ աստղերի մասնակցությամբ, քանի որ հոլիվուդյան դերասանների գործադուլի պատճառով առաջին մեծության շատ աստղեր չեն հայտնվի հայտնի կարմիր գորգի վրա:
Մինչև սեպտեմբերի 9-ը տևող միջոցառման ժամանակ հեղինակավոր «Ոսկե առյուծի» համար կպայքարեն Բրեդլի Կուպերի, Յորգոս Լանտիմոսի, Դեյվիդ Ֆինչերի, Մայքլ Մանի, Սոֆիա Կոպոլայի, Ավա Դյուվերնեյի և Ռյուսուկե Համագուչիի նոր ֆիլմերը:
Վենետիկը պարբերաբար առաջադրում է «Օսկարի» գլխավոր ֆավորիտներին. լավագույն ռեժիսուրայի համար «Օսկարի» վերջին 11 մրցանակից ութը ստացել են Վենետիկում ներկայացված ֆիլմերը, այդ թվում ՝ «Լա Լա Լենդ»-ը՝ 2016 թվականին, որը նկարահանել է այս տարվա ժյուրիի նախագահ Դեմիեն Շազելը:
Վենետիկը պատրաստվում է ցուցադրել նաև Վուդի Ալենի, Լյուկ Բեսոնի և Ռոման Պոլանսկու նոր ֆիլմերը:
