Կոչ ենք անում ՀՀԿ-ին չգնալ սադրանքների եւ ընդունել ժողովրդի հաղթանակի փաստը

Կոչ ենք անում Հայաստանի Հանրապետական կուսակցությանը չգնալ սադրանքների ու առճակատման ճանապարհով եւ վերջնականապես ընդունել Հայաստանի ժողովրդի բացարձակ մեծամասնության կամքը։ Հայաստանում վերջին օրերին ծավալված իրադարձությունները անկասկած վկայում են այն մասին, որ տեղի ունեցածը համազգային ժողովրդական հեղափոխություն է, որի պահանջը քաղաքացիների մեջ հասունացել էր տասնյակ տարիների ընթացքում։ Այս առումով ճիշտ կլինի ՀՀԿ-ն հետեւի նախկին վարչապետ Սերժ Սարգսյանի օրինակին ու առանց առճակատման գնալու ընդունի Հայաստանի քաղաքացիների ու աշխարհասփյուռ հայության պահանջները։

Համոզված ենք, որ ստեղծված իրավիճակում երկխոսությունը ՀՀԿ-ի հետ ոչ մի էական արդյունքի չի կարող հանգեցնել, քանզի փողոց դուրս եկած ժողովրդի պահանջը մեկն է,  որ ՀՀԿ-ն հրաժարվի իր կողմից անօրինական ճանապարհով ձեռքբերված իշխանությունից եւ երկրում տեղի ունենան նոր թափանցիկ ընտրություններ։

Բազմաթիվ ջավախքահայեր ու թիֆլիսահայեր շարժման առաջին իսկ օրերից միացել են իրենց հայաստանաբնակ ազգակիցներին եւ որպես մեկ ազգ ու ժողովուրդ առաջ մղել այս համաժողովրդական շարժումը։

Մենք մեր ժողովրդի անունից լիարժեք աջակցությունն ենք հայտնում այս համաժողովրդական շարժմանը ու կոչ անում Հայաստանի հեռացող իշխանություններին վերջապես ընդունել հայ ժողովրդի բացարձակ մեծամասնության կամքը։

Սամցխե-Ջավախքի Մեդիա Վերլուծական կենտրոն

Ախալցխայի ժողովրդական խորհուրդ

Վրաստանում Հայ Գիտակների Ակումբ

26.04.2018թ․