Վրաց ժողովուրդը, Վրաստանի կառավարությունը կանգնած է միջազգային հանրության կողքին,- այս մասին ԱՄՆ-ի Պետքարտուղարության ներկայացուցիչ Նեդ Փրայսը հայտարարել է ճեպազրույցում:
Լրագրողը ԱՄՆ-ի Պետքարտուղարության ներկայացուցչին հարցրել է Ուկրաինայի պաշտպանության նախարարության հետախուզական ծառայության հայտարարության մասին, ըստ որի՝ «միջազգային պատժամիջոցների սահմանման պատճառով Ռուսաստանի Դաշնությունը զրկված է ռազմական, երկակի օգտագործման և քաղաքացիական ապրանքների մատակարարման հնարավորությունից։ Պատժամիջոցները շրջանցելու համար ռուս գործակալները մաքսանենգության ուղիներ են ստեղծում, որոնք անցնում են մասնավորապես Վրաստանի տարածքով։ Միևնույն ժամանակ վրացական հատուկ ծառայությունների ներկայացուցիչները քաղաքական ղեկավարությունից ցուցումներ են ստացել՝ չմիջամտել մաքսանենգների գործունեությանը»։
Հարցին, թե արդյոք Միացյալ Նահանգները որևէ տեղեկություն ունի Ուկրաինայի հետախուզությանը աջակցելու համար, և ինչպիսի հետևանքներ կունենան այն երկրների համար, որոնք փորձում են օգնել Բելառուսին կամ Ռուսաստանին՝ շրջանցելու պատժամիջոցները, Նեդ Փրայսը պատասխանել է, որ ԱՄՆ-ի պաշտոնյաները սերտ կապեր ունեն իրենց վրացի գործընկերների հետ:
«Ես ի վիճակի չեմ խոսելու ձեր կողմից ներկայացված մեղադրանքների էության մասին։ Մենք այդ մասին խոսեցինք անցյալ շաբաթ, բայց վրաց ժողովուրդը համեմատաբար լավ է հիշում, թե ինչ է նշանակում ռուսական ագրեսիա, այդ թվում՝ ինքնիշխան տարածքներ արմատախիլ անելու Ռուսաստանի փորձերը։ Մենք տեսանք, որ վրաց ժողովուրդը, Վրաստանի կառավարությունը կանգնած է միջազգային հանրության կողքին, այդ թվում՝ ՄԱԿ-ի կարևոր քվեարկություններում, ընդդեմ նրան, ինչ անում է Կրեմլը Ուկրաինայում։ Մենք սերտ շփումներ ունենք Վրաստանի մեր գործընկերների հետ՝ կապված ներկա իրավիճակի հետ, և մենք կշարունակենք սերտ կապի մեջ լինել նրանց հետ»,- ասել է Նեդ Փրայսը։
Ինչ վերաբերում է պատժամիջոցները շրջանցելուն օգնելու սպասվող հետևանքներին, Նեդ Փրայսը նշեց, որ ԱՄՆ-ն, չխոսելով կոնկրետ երկրի մասին, ասել է, որ այն երկրները, որոնք փորձում են շրջանցել ԱՄՆ-ի և նրա գործընկերների կողմից սահմանված պատժամիջոցները, կամ երկրները, որոնք անում են ինչ-որ բան՝ փորձելով աջակցել Կրեմլի ռազմական ջանքերը ֆինանսապես կամ զենք մատակարարելով՝ դրանք կբախվեն հետևանքների։
