Գազան կրակի մեջ է. Իսրայել Կաց

Իսրայելի պաշտպանության նախարարը X-ի էջում գրել է. «Գազան կրակի մեջ է։ Բանակը երկաթե բռունցքով հարվածում է ահաբեկչական ենթակառուցվածքներին, ինչպես նաև պայմաններ ստեղծում պատանդների ազատ արձակման համար»։ Իսրայել Կացը նախազգուշացրել է՝ չեն թուլացնի ճնշումը, մինչև չհասնեն բոլոր նպատակներին:

Դոնալդ Թրամփն էլ հերթական անգամ կոչ է արել ՀԱՄԱՍ-ին ազատել գերիներին, այլապես հետևանքներ կլինեն: ԱՄՆ նախագահը հայտնել է, որ իսրայելական ցամաքային գործողության ֆոնին պաղեստինյան շարժումը պատանդներին օգտագործում է որպես կենդանի վահան: Axios-ի տվյալով՝ իսրայելական գործողությունը սկսվել է ԱՄՆ պետքարտուղարի հետ Բենիամին Նեթանյահուի հանդիպումից մի քանի ժամ անց։ Հաղորդվում է, որ Մարկո Ռուբիոն աջակցություն է հայտնել իսրայելական գործողությանը, սակայն հույս է հայտնել, որ այն հնարավորինս շուտ կավարտվի։

Մինչ այդ Գազայում զոհերի թիվն ավելանում է: ՑԱՀԱԼ-ը կոչ է արել պաղեստինցիներին հեռանալ հարավ: Գազա քաղաքի 300.000 բնակիչ արդեն տեղահանվել է:

Երուսաղեմում էլ ցույցեր են: Մարդիկ հավաքվել են Նեթանյահուի գրասենյակի դիմաց՝ պահանջելով դադարեցնել պատերազմը և վերադարձնել գերիներին: