Արաբական և իսլամական երկրները պատրաստվում են արտահերթ գագաթնաժողով անցկացնել Կատարում. Sky News Arabia

Արաբական և իսլամական պետությունները մտադիր են մոտ ապագայում արտահերթ գագաթնաժողով անցկացնել Կատարի մայրաքաղաքում: Այս մասին հայտնել է Sky News Arabia հեռուստաալիքը: Ըստ նրա տվյալների՝ հանդիպումը կարող է տեղի ունենալ արդեն հաջորդ շաբաթ:

Որոշ ժամանակ առաջ Կատարի վարչապետ և արտաքին գործերի նախարար շեյխ Մոհամմեդ ալ Թանին հեռախոսազրույցներ է ունեցել Սաուդյան Արաբիայի, ԱՄԷ-ի, Օմանի, Եգիպտոսի, Հորդանանի և Լիբանանի կառավարության ղեկավարների ու արտգործնախարարների հետ:

Կատարի ԱԳՆ հայտարարությունների համաձայն՝ բոլոր զրուցակիցները դատապարտել են Իսրայելի կողմից Դոհայում ՀԱՄԱՍ-ի ղեկավարության անդամների նստավայրին հասցված հարվածը՝ այդ քայլը գնահատելով որպես միջազգային իրավունքի բոլոր նորմերի կոպիտ խախտում, որը սպառնում է Էմիրության և տարածաշրջանի անվտանգությանը: Արաբական վեց երկրի ներկայացուցիչները հայտարարել են, որ աջակցում են երկրի ինքնիշխանությունը պաշտպանելու համար Կատարի իշխանությունների ձեռնարկած բոլոր միջոցառումներին:

Սեպտեմբերի 9-ին Դոհայում մի շարք պայթյուններ են որոտացել։ Իսրայելի բանակի մամուլի ծառայությունը հայտնել է, որ զինվորականներն ընդհանուր անվտանգության ծառայության աջակցությամբ և ռազմաօդային ուժերի մասնակցությամբ հարվածներ են հասցրել Կատարի մայրաքաղաքում հիմնավորված ՀԱՄԱՍ-ի ներկայացուցիչներին: