Ռուսաստանը երբեք չի ուղղել իր ԱԹՍ-ները, հրթիռները ԵՄ-ի կամ ՆԱՏՕ-ի վրա․ Լավրով

Ռուսաստանը երբեք չի հարվածել քաղաքացիական օբյեկտներին և չի ուղղել իր ԱԹՍ-ները կամ հրթիռները Եվրոպական միության կամ ՆԱՏՕ-ի երկրների վրա։ Այս մասին հայտարարել է Ռուսաստանի ԱԳ նախարար Սերգեյ Լավրովը ՄԱԿ-ի Գլխավոր ասամբլեայի 80-րդ նստաշրջանի բարձր մակարդակի շաբաթվա արդյունքներին նվիրված մամուլի ասուլիսում՝ փոխանցում է ТАСС-ը։

«Մենք երբեք չենք հարվածում քաղաքացիական օբյեկտներին։ Պատահականություններ լինում են, սակայն մենք երբեք միտումնավոր չենք կրակում։ Մենք երբեք չենք ուղղում մեր անօդաչու թռչող սարքերն ու հրթիռները այն պետությունների վրա, որոնք գտնվում են Եվրոպայում՝ Եվրամիության կամ Հյուսիսատլանտյան դաշինքի անդամ երկրների վրա»,-ասել է նա։

Ավելի վաղ Bloomberg-ը, հղում անելով իր աղբյուրներին, հայտնել էր՝ եվրոպացի դիվանագետները նախազգուշացրել են Կրեմլին, որ ՆԱՏՕ-ի երկրները պատրաստ են պատասխանել իրենց օդային տարածքի հետագա խախտումներին, այդ թվում՝ խոցելով ռուսական ինքնաթիռները։ 

 

Գործակալության զրուցակիցների խոսքով՝ Մոսկվայում կայացած հանդիպման ժամանակ Մեծ Բրիտանիայի, Ֆրանսիայի և Գերմանիայի ներկայացուցիչները «մտահոգություն են հայտնել» սեպտեմբերի 19-ին Էստոնիայի օդային տարածք ռուսական կործանիչների ներխուժման կապակցությամբ։

 

Ռուսաստանի իշխանությունները պաշտոնապես հերքում են, որ կործանիչները մտել են Էստոնիայի օդային տարածք։ Էստոնիայի իշխանությունները հայտարարել են, որ երեք ռուսական МиГ-31 ներխուժել է երկրի օդային տարածք և այնտեղ մնացել 12 րոպե։