Եթե ՌԴ-ն ժամանակ ձգի, ԱՄՆ-ն կվերանայի իր դիրքորոշումը. Ռուբիո
ԱՄՆ պետքարտուղար Մարկո Ռուբիոն այսօր մեկնաբանել է ուկրաինական հարցի շուրջ բանակցային գործընթացի առաջընթացը և Ռուսական ուղղակի ներդրումների հիմնադրամի ղեկավար և արտասահմանյան երկրների հետ ներդրումների ու տնտեսական համագործակցության հարցերով նախագահի հատուկ ներկայացուցիչ Կիրիլ Դմիտրիևի այցը Վաշինգտոն։
Պետքարտուղարն ասել է, որ Սպիտակ տունը ուշադիր հետևում է Ռուսաստանի գործողություններին և կգնահատի Մոսկվայի պատրաստակամությունը խաղաղությանը, իսկ դա հասկանալու համար ոչ թե ամիսներ, այլ մի քանի շաբաթն էլ բավարար է։
Ռուբիոն ընդգծել է, որ Թրամփը մտադիր չէ անվերջ բանակցություններ վարել և պատրաստ է մեծացնել պատժամիջոցների ճնշումը Ռուսաստանի վրա։
«Մենք շուտով կիմանանք՝ արդյոք Ռուսաստանը լրջորե՞ն է վերաբերվում խաղաղությանը։ Եթե այո, հրաշալի է, եթե ոչ, ապա պետք է վերագնահատենք մեր դիրքորոշումն ու անելիքները»,- ասել է պետքարտուղարը։
Ռուբիոյի խոսքով՝ Ուկրաինան արդեն ցույց է տվել հրադադարի և բանակցությունների իր պատրաստակամությունը։ Այժմ, նշել է նա, Ռուսաստանն ու նրա ղեկավարությունը պետք է որոշում կայացնեն։ Նա նաև հավելել է, որ Ուկրաինայում հրադադարը մի քանի անգամ խախտվել է։
Ամերիկյան լրատվամիջոցների փոխանցմամբ՝ ԱՄՆ Կոնգրեսն արդեն սկսել է պատժամիջոցներ պատրաստել այն դեպքում, եթե ՌԴ-ն հրաժարվի հրադադարից։
Ըստ CNN-ի՝ ԱՄՆ պետքարտուղար Մարկո Ռուբիոն Վաշինգտոնում հանդիպել է Կիրիլ Դմիտրիևի հետ, դիվանագետների խոսակցությունը սպառնալից բնույթ չի կրել, այն «ԱՄՆ դիրքորոշման հստակեցման» մասին է եղել, նշում է լրատվական գործակալությունը։
Ի դեպ, պետքարտուղարը հերքել է ՌԴ-ի և ԱՄՆ-ի միջև ուղիղ ավիահաղորդակցության հնարավոր վերսկսման մասին Դմիտրիևի հայտարարությունները: Նա զարմացել է, թե ինչպես են թռչելու պատժամիջոցների տակ գտնվող մարդիկ:
