Հարավային Կորեայի Սահմանադրական դատարանը հաստատել է Յուն Սոկ Յոլի իմփիչմենթը

Հարավային Կորեայի Սահմանադրական դատարանի դատավորները հավանություն են տվել նախագահ Յուն Սոկ Յոլի իմփիչմենթին, որը հայտարարվել էր չորս ամիս առաջ։ Ութ դատավոր միաձայն որոշել է, որ նա գերազանցել է իր լիազորությունները՝ երկրում ռազմական դրություն հայտարարելով, հայտնում է Reuters-ը։

Սահմանադրական դատարանի որոշումը նշանակում է, որ Հարավային Կորեան պետք է նախագահի ընտրություն անցկացնի 60 օրվա ընթացքում։ Այդ ժամանակահատվածում երկրի ղեկավարի պաշտոնը կզբաղեցնի վարչապետ Հան Դոկ Սուն, որի նկատմամբ խորհրդարանը նույնպես անվստահություն էր հայտնել, սակայն Սահմանադրական դատարանը մարտի վերջին հրաժարվել է հաստատել այն։

Յուն Սոկ Յոլի իմփիչմենթի գործընթաց սկսվել է, երբ նա փորձել է երկրում ռազմական դրություն հաստատել 2024 թվականի դեկտեմբերի սկզբին, զորքեր մտցրել խորհրդարանի տարածք և Ազգային ընտրական հանձնաժողովի շենք ու փորձել ձերբակալել ընտրված ներկայացուցիչներին և դատավորներին:

Նա դարձել է իմփիչմենթի ենթարկված Հարավային Կորեայի երկրորդ նախագահը, ութ տարի առաջ նման ճակատագրի է արժանացել Պակ Գըն Հյեն՝ կոռուպցիոն սկանդալի պատճառով: