Շնորհակալ ենք մեր հանդեպ Հայաստանի վստահության համար. ԵՄ առաքելություն
Հայաստանում ԵՄ առաքելությունը (EUMA) այսօր նշում է կարևոր իրադարձություն՝ առաքելության հիմնադրումից ի վեր 5000-րդ պարեկությունը:
«EUMA-ն այսօր հպարտությամբ նշում է մի կարևոր իրադարձություն՝ առաքելության հիմնադրումից ի վեր մեր 5000-րդ պարեկությունը: Տարածաշրջանում խաղաղությանն ու անվտանգությանն աջակցելու մեր հանձնառությունը մնում է անսասան։ Շնորհակալ ենք մեր հանդեպ Հայաստանի վստահության համար»,- գրված է առաքելության X-ի էջում։
ԵՄ առաքելությունը Հայաստանում (EUMA) մեկնարկել է 2023 թվականի փետրվարի 20-ին ԵՄ արտաքին հարաբերությունների խորհրդի որոշմամբ: Առաքելության առջև խնդիր է դրված հետևել ու զեկուցել իրավիճակի մասին տեղերում՝ նպաստելով հակամարտությունից տուժած շրջաններում մարդկանց անվտանգության ապահովմանը, հնարավորինս աջակցելով Հայաստանի և Ադրբեջանի միջև վստահության ամրապնդմանը:
EUMA-ն տեղակայված է Ադրբեջանի հետ միջազգային սահմանի հայկական կողմում, գլխամասային գրասենյակը գտնվում է Եղեգնաձորում, վեց հենակետը՝ Եղեգնաձորում, Ջերմուկում, Մարտունիում, Կապանում, Գորիսում և Իջևանում, կապի գրասենյակ ունի նաև Երևանում:
