Թրամփն անդրադարձել է BRICS-ում արժույթ ստեղծելու հնարավորությանը
ԱՄՆ նախագահը կրկին հայտարարել է, որ 100 տոկոսի մաքսատուրքեր կսահմանի BRICS անդամների նկատմամբ, եթե նրանք փորձեն նոր արժույթ ստեղծել կամ հրաժարվել դոլարից։ Դոնալդ Թրամփի խոսքով՝ Վաշինգտոնը կպահանջի BRICS-ի «թշնամական երկրներից» պարտավորվել չգնալ նման քայլի:
«Այլապես նրանք ստիպված կլինեն հրաժեշտ տալ ԱՄՆ հիասքանչ տնտեսության հետ հարաբերություններին»,- Truth Social-ի էջում գրել է Թրամփը: Նա հավելել է՝ այս նախազգուշացումը վերաբերում է ամբողջ աշխարհին:
Միասնական արժույթի ստեղծման հարցը քննարկվել է 2023-ի BRICS գագաթնաժողովում։ Կազմակերպության անդամները կարծիք են հայտնել, որ այդպիսով առևտրային գործարքները և նախագծերի ֆինանսավորումը կհեշտանան: Միասնական արժույթը նաև պետք է նվազեցնի միջազգային հաշվարկներում դոլարից և եվրոյից կախվածությունը:
2024 թվականի հոկտեմբերին ՌԴ նախագահ Վլադիմիր Պուտինը, սակայն, հայտարարել է, որ միասնական արժույթ ստեղծելու պահը դեռ չի հասունացել, այժմ դիտարկվում է ազգային արժույթների օգտագործումն ընդլայնելու հնարավորությունը։
