ԵՄ-ի և ԱՄՆ-ի դիվանագետները փորձում են կանխել էսկալացիան Մերձավոր Արևելքում
ԱՄՆ-ի և ԵՄ դիվանագետները հրատապ քննարկումներ են անցկացնում շահագրգիռ կողմերի հետ Մերձավոր Արևելքում՝ փորձելով կանխել լայնածավալ տարածաշրջանային պատերազմի վտանգը, երբ Իսրայելը հարվածներ հասցրեց «Հեզբոլլահի» և ՀԱՄԱՍ-ի առաջնորդներին Բեյրութում ու Թեհրանում՝ գրում է Financial Times-ը:
Թեհրանում բանակցություններ է վարում ԵՄ արտաքին քաղաքականության ղեկավարի տեղակալ Էնրիկե Մորան, իսկ Սպիտակ տան Մերձավոր Արևելքի հարցերով բարձրաստիճան պաշտոնյա Բրեթ Մաքգերքը խնդիրը քննարկել է Սաուդյան Արաբիայում:
Պաշտոնյաները նշել են, որ բանակցությունների նպատակն է գտնել փաստարկներ, որոնք կարող են «համոզել Թեհրանին կա՛մ չպատասխանել, կա՛մ խորհրդանշական գործողություն իրականացնել», քանի որ իսրայելցի դիվանագետներն արևմտյան զրուցակիցներին ասել են, որ իրենց զինուժը հետագա գործողություններ չի ծրագրում՝ գրում է պարբերականը։
CNN-ն էլ, հղում անելով իր աղբյուրին, հայտնել է, որ ԱՄՆ պետքարտուղար Էնթոնի Բլինքենը Կատարի միջոցով ուղերձ է հղել Իրանին՝ խնդրելով հակահարված չտալ Թեհրանում ՀԱՄԱՍ-ի քաղբյուրոյի ղեկավար Իսմայիլ Հանիեի սպանությունից հետո: Կատարի ԱԳ նախարար Շեյխ Մուհամեդ բեն Աբդուլ Ռահման Ալ Թանին համաձայնել է կատարել ԱՄՆ պետքարտուղարի խնդրանքը:
Financial Times-ը գրում է, որ Արևմուտքի դիվանագիտական ճնշումը մեծացել է տարածաշրջանային ավելի լայնածավալ հակամարտության վախի պատճառով, երբ Իրանը և «Հեզբոլլահը» խոստացել են կոշտ պատասխանել Իսրայելին՝ Թեհրանում ՀԱՄԱՍ-ի, Բեյրութում «Հեզբոլլահի» առաջնորդներ Իսմայիլ Հանիեի և Ֆուադ Շուքրի սպանությունների համար:
«Անկասկած, Իրանի պատասխանը իսրայելական ռեժիմին ցավոտ ու տանջալի կլինի և կստիպի նրան զղջալ, ռեժիմն այդ պատասխանը երբեք չի մոռանա»,- հայտարարել է Իրանի խորհրդարանի ազգային անվտանգության ու արտաքին քաղաքականության հանձնաժողովի նախագահ Էբրահիմ Ազիզին։
