Ռուսաստանը պաշտոնական ազդակներ չի տեսնում ՀԱՊԿ-ից Հայաստանի դուրս գալու ցանկության մասին. Պեսկով
Արևմտամետ վերլուծաբանները խոսում են Հավաքական անվտանգության պայմանագրի կազմակերպությունից (ՀԱՊԿ) դուրս գալու՝ Հայաստանի ենթադրյալ ցանկության մասին, սակայն Ռուսաստանի Դաշնությունը նման պաշտոնական ազդակներ չի տեսնում, լրագրողներին ասել է ՌԴ նախագահի մամուլի քարտուղար Դմիտրի Պեսկովը մամուլի ասուլիսի ժամանակ։
Հարցին, թե արդյոք Ռուսաստանը պատրաստ է պաշտպանելու Հայաստանին, եթե հարձակվեն այդ երկրի տարածքի վրա, խոսնակն ասել է. «Եթե խոսքը Հայաստանի տարածքի մասին է, գիտեք, մենք պարտավորություններ ունենք ՀԱՊԿ-ի շրջանակներում: Իմացեք նաև, որ այն բանից հետո, երբ Հայաստանը ճանաչեց Ադրբեջանի տարածքային ամբողջականությունը 1991 թվականի սահմաններում, հանգամանքները փոքր-ինչ փոխվեցին, ուստի դա նույնպես պետք է հաշվի առնել, դա Երևանի որոշումն էր»:
ՌԴ նախագահի մամուլի քարտուղար Դմիտրի Պեսկովն անդրադարձել է նաև Հայաստանում ԱՄՆ զորավարժություններին: Նա ասել է, որ Ռուսաստանը կվերլուծի, թե ինչու է Հայաստանն ԱՄՆ-ի, այլ ոչ ՀԱՊԿ-ի հետ զորավարժությունների մասին որոշումներ կայացնում։ Նա ընդգծել է, որ Մոսկվան «կփորձի հասկանալ, թե ինչու հենց Հայաստանն է նման որոշումներ կայացնում, ինչ նպատակներ են հետապնդվում»։ Պեսկովը միաժամանակ նշել է, որ նման վերլուծություն կիրականացվի Երևանի հետ սերտ, գործընկերային երկխոսության ընթացքում:
