Միացյալ Նահանգները փորձարկել է արդիականացված Minuteman III միջմայրցամաքային բալիստիկ հրթիռը

Նոյեմբերի 4-ին Միացյալ Նահանգները փորձարկել է արդիականացված LGM-30G Minuteman III միջմայրցամաքային բալիստիկ հրթիռը Կալիֆոռնիայի առափնյա Վանդենբերգ ռազմաբազայից։

Այն տեղի է ունեցել միջուկային փորձարկումների որոշ տեսակների վերսկսման մասին նախագահ Դոնալդ Թրամփի հրահանգից անմիջապես հետո՝ աշխուժացնելով ժամանակակից աշխարհաքաղաքականության մեջ միջուկային զսպման դերի մասին բանավեճը։ Սակայն պաշտոնյաները պնդել են, որ փորձարկումը պլանավորված էր և չի ներառել մարտագլխիկի պայթեցում։ Դրա նպատակն է եղել ԱՄՆ միջուկային եռյակի հիմնական տարրերից մեկի հուսալիությունն ու ճշգրտությունը ստուգելը՝ գրում են լրատվամիջոցները։

Եռաստիճան, պինդ վառելիքով Minuteman III հրթիռի նոր տարբերակն ունի 10000 կիլոմետր հեռահարություն և կարող է հասնել իր թիրախին ընդամենը տասնյակ րոպեների ընթացքում։

Պենտագոնի այս փորձարկումից հետո Ռուսաստանի պաշտպանության նախարար Անդրեյ Բելոուսովը հայտարարել է, որ «նպատակահարմար է համարում անհապաղ սկսել լայնածավալ միջուկային փորձարկումների նախապատրաստական ​​աշխատանքները»։

Նախարարն ընդգծել է, որ «Նովայա զեմլյա» փորձարկման հրապարակի վիճակը թույլ է տալիս արագ անցկացնել միջուկային փորձարկումներ։