Որոշակի դրական մթնոլորտ կա. Միրզոյանը՝ տրանսպորտային ենթակառուցվածքների ապաշրջափակման ուղղությամբ քայլերի մասին
2025 թվականի պետական բյուջեի նախագծի քննարկման ժամանակ ՀՀ արտաքին գործերի նախարար Արարատ Միրզոյանն անդրադարձավ նաև տարածաշրջանի տրանսպորտային ենթակառուցվածքների ապաշրջափակմանը, ընդգծեց՝ այս առումով 2024-ին ևս քայլեր արվել են:
«Գիտեք, որ մենք ադրբեջանական կողմին առաջարկներ ենք փոխանցել, որոնք, ըստ էության, կիսապաշտոնական կերպով ողջունվել են նաև: Սա ասում եմ՝ ցույց տալու, որ այստեղ որոշակի դրական մթնոլորտ կա, և մենք կշարունակենք առաջիկայում աշխատանքներն ադրբեջանական կողմի հետ` ապաշրջափակման հարցում գալու ընդհանուր համաձայնության»,- ասաց ԱԳ նախարարը:
Նա հիշեցրեց՝ հայկական կողմի սկզբունքներն այս առումով հետևյալն են. բոլոր այն ենթակառուցվածքները, որոնք պետք է ապաշրջափակվեն, պետք է մնան այն երկրների ինքնիշխանության ներքո ու գործեն այն երկրների օրենսդրությանը համապատասխան, որոնց տարածքով անցնում են։
«Ամեն ինչ պետք է արվի փոխադարձության ու հավասարության սկզբունքի հիման վրա»,- ընդգծեց Միրզոյանը՝ հիշեցնելով, որ այս սկզբունքներն արտացոլված են ՀՀ կառավարության ներկայացրած «Խաղաղության խաչմերուկ» ծրագրում:
««Խաղաղության խաչմերուկն» է այն տեսլականը, որի մեջ մենք նաև տեսնում ենք Ադրբեջանի և Հայաստանի տրանսպորտային, լոգիստիկ ենթակառուցվածքների ապաշրջափակումը»,- հայտնեց նախարարը:
