Տեղահանված արցախցիները սահմանամերձ բնակավայրերում տուն գնելիս 14 մլն դրամ կստանան
Աղավնոյից, Բերձորից, Սուսից օգոստոսին տեղահանված արցախցիները կօգտվեն բնակարանային ապահովման պետական ծրագրից: Հայաստանի Կառավարությունը վերանայել է Արցախի առանձին շրջաններից տեղահանված արցախցիների համար հիփոթեքի ծրագիրը:
4000 ընտանիք կարող է օգտվել՝ վճարելով միայն կանխավճարի 1-10 տոկոսը՝ կախված, թե որտեղ է ուզում տուն գնել՝ Արցախում, Հայաստանի մարզերում, թե Երևանում:
Կառավարության նոր որոշմամբ՝ Հայաստանի սահմանամերձ համայնքներում անշարժ գույք ձեռք բերելու կամ անհատական տուն կառուցելու դեպքում արցախցիների համար սահմանվել են առավել բարենպաստ պայմաններ:
Դավիթ Խաչատրյան (ՀՀ աշխատանքի և սոցիալական հարցերի նախարարի տեղակալ) — Սահմանամերձ գյուղական բնակավայրերի համար բնակելի տան ձեռքբերման դեպքում 14 միլիոն մայր գումարը վարկի և 13 տոկոս տոկոսագումարի գծով կվճարի պետությունը, իսկ սահմանամերձ բնակավայրում տուն կառուցելու համար հիփոթեքային վարկի դեպքում՝ 16 մլն դրամ և 13 տոկոս տոկոսադրույք:
Սահմանամերձ համայնքում տուն ձեռք բերելու համար արցախցին կվճարի ընդամենը 1 տոկոս կանխավճար: Փոխնախարար Խաչատրյանը հիշեցրեց՝ Երևանում հիփոթեքով բնակարան գնելու կանխավճարը առնվազն 10 տոկոս է, մարզերում՝ 5, Արցախում՝ կրկին 1 տոկոս: Արցախում, մարզերում, Երևանում անշարժ գույքի ձեռքբերման կամ կառուցման պայմանները չեն փոխվել:
Դավիթ Խաչատրյան — Երևանի դեպքում մայր գումար՝ 8 մլն, 8 տոկոս, մարզերի դեպքում՝ 10 մլն, 10 տոկոս, Արցախի դեպքում՝ 12 մլն, 12 տոկոս:
Հայաստանի 900 գյուղական բնակավայրից 80-ը սահմանամերձ են: Ծրագրի առաջնահերթ նպատակը, ըստ փոխնախարարի, տեղահանված արցախցիների բնակարանի հարցի լուծումն է: Սահմանամերձ գյուղերում հնարավոր է առավել մատչելի պայմաններով տուն ձեռք բերել: Խաչատրյանի գնահատմամբ՝ ծրագիրն այդ առումով լավ հնարավորություն է: Ձեռք բերվող բնակարանի սեփականության իրավունքի գրանցման, կադաստրային ծախսերը ևս կհոգա պետությունը:
Դավիթ Խաչատրյան — Շահառուների ցանկը Արցախի կառավարության կողմից տրամադրվել է: Ճշգրտվել, փոփոխվել է այդ ցանկը: Հնգօրյա ժամկետում վերջնական ցանկը Արցախից կստանանք, որից հետո կսկսվեն հավաստագրերի թողարկումը, տրամադրումը:
Հավաստագրերը ստանալուց հետո մեկ տարի դրանք կլինեն ուժի մեջ: Ֆինանսավարկային կազմակերպությունների ընտրությունը, ըստ Խաչատրյանի, լայն է, շահառուները կարող են շուտով սկսել հիփոթեքի վարկավորման, բնակարանի ձեռքբերման գործընթացը:
44-օրյա պատերազմից հետո Հայաստանում բնակվում է 20 հազար արցախցի:
Նրանցից մոտ 15 հազարը բնակապահովման այս ծրագրի մասնակից կարող են դառնալ: Եթե բնակարանի արժեքը գերազանցի պետական աջակցության սահմանաչափը, տարբերությունը կվճարի շահառուն:
Ծրագրի տարեկան բյուջեն մոտ 7 միլիարդ դրամ է:
