Ռուսական հարվածներ Ուկրաինայում. առնվազն երեք զոհ, տասնյակ վիրավորներ

Զապորոժիե քաղաքին և Զապորոժիե շրջանին ռուսական բանակի հարվածների հետևանքով մեկ մարդ զոհվել է, ևս 12-ը՝ վիրավորվել: Այս մասին հուլիսի 26-ի առավոտյան Telegram ալիքում հայտնել է տարածաշրջանային ռազմական վարչակազմի ղեկավար Իվան Ֆյոդորովը։ Նրա տվյալներով՝ մեկ օրում ՌԴ ԶՈՒ-ն 1029 հարված է հասցրել Զապորոժիեի մարզի 50 բնակավայրի ուղղությամբ։ Արդյունքում վնասվել են 80 ենթակառուցվածքների օբյեկտ, բնակարաններ, ավտոմեքենաներ, տնտեսական շինություններ։

Խերսոնի շրջանի ղեկավար Ալեքսանդր Պրոկուդինը հուլիսի 26-ի առավոտյան Telegram-ում գրել է, որ տարածաշրջանի վրա ռուսական հարձակումների հետևանքով երկու մարդ է զոհվել, իսկ 24-ը՝ վիրավորվել։

Կիևի քաղաքապետ Վիտալի Կլիչկոն էլ հայտնել է, որ հուլիսի 26-ի առավոտյան Ուկրաինայի մայրաքաղաքի վրա ռուսական հարձակման հետևանքով երեք բնակիչ է վիրավորվել։

Ուկրաինայի ռազմաօդային ուժերի հաղորդագրության համաձայն՝ հուլիսի 26-ի գիշերը Ռուսաստանը հարձակվել է Ուկրաինայի վրա՝ Սև ծովի օդային տարածքից արձակված Kh-59/69 կառավարվող «օդ-օդ» դասի հրթիռով, յոթ «Իսկանդեր-Մ/Ս-400» բալիստիկ հրթիռով, ինչպես նաև 136 գրոհային անօդաչու թռչող սարքով և անօդաչու թռչող սարքերի սիմուլյատորներով, որոնք արձակվել են Ռուսաստանի Բրյանսկի, Կուրսկի, Օրյոլի, Միլլերովոյի և Պրիմորսկո-Ախտարսկի ուղղություններից։