Ռուսաստանը և Ուկրաինան փոխանակել են ռազմագերիներ «205-ը՝ 205-ի դիմաց»

Ռուսաստանը և Ուկրաինան իրականացրել են «205-ը՝ 205-ի դիմաց» ձևաչափով ռազմագերիների փոխանակում: Այս մասին հայտարարել է Ռուսաստանի պաշտպանության նախարարությունը:

Ռազմական գերատեսչությունը հավելել է, որ մարդասիրական բնույթի միջնորդություն է ցուցաբերել Արաբական Միացյալ Էմիրությունները: Ռուսաստանցի զինծառայողները գտնվում են Բելառուսում, որտեղ ստանում են հոգեբանական և բժշկական օգնություն: Ավելի ուշ նրանք կտեղափոխվեն Ռուսաստան՝ բուժման և վերականգնման համար:

Ուկրաինայի նախագահ Վոլոդիմիր Զելենսկին հաստատել է, որ ռուսական գերությունից վերադարձել են Ուկրաինայի զինված ուժերի, Ազգային գվարդիայի և Պետական ​​սահմանապահ ծառայության զինծառայողները: «Սա 1000-ը 1000-ի դիմաց փոխանակման առաջին փուլն է»,- ասել է Զելենսկին:

Նրա խոսքով՝ ազատ արձակվածների թվում են շարքայիններ, սերժանտներ և սպաներ։ «Նրանց մեծ մասը 2022 թվականից գտնվում էր ռուսական գերության մեջ։ Նրանք պաշտպանել են Ուկրաինան Մարիուպոլում և Ազովստալում, Դոնեցկի, Լուգանսկի, Խարկովի, Խերսոնի, Զապորոժիեի, Սումիի, Կիևի ուղղություններում և Չեռնոբիլի ատոմակայանում»,- նշել է Ուկրաինայի նախագահը։