Սիրիայի անվտանգության ուժերը վերահսկողություն են հաստատել Ռաքքայի բանտի նկատմամբ

Սիրիայի անցումային կառավարության ներքին գործերի նախարարությունը վերահսկողություն է հաստատել երկրի հյուսիս-արևելքում գտնվող Ռաքքա նահանգի Ալ Աքթան բանտի նկատմամբ, որտեղ նախկինում անվտանգությունն ապահովում էր քրդական «Սիրիական ժողովրդավարական ուժեր» կոալիցիան։ Այդ մասին ասվում է Al-Ikhbaria հեռուստաալիքով հրապարակված հայտարարության մեջ։

Տեղական իշխանությունների տվյալներով՝ Ալ Աքթանում պահվում է 2000 բանտարկյալ, ԻՊ-ի անդամների թիվը չի նշվում։

Ներքին գործերի նախարարության տվյալներով՝ ուսումնասիրվում են բանտարկյալների պահման պայմանները, հակաահաբեկչական վարչության մասնագիտացված խմբեր են ստեղծվել՝ հաստատությունում անվտանգությունն ու կարգուկանոնը պահպանելու համար։

Սիրիական ժողովրդավարական ուժերի մարտիկների դուրսբերումը բանտից սկսվել է հինգշաբթի։ Հեռուստաալիքի տվյալներով՝ մոտ 800 քուրդ աշխարհազորային լքել է բազան և ուղարկվել Այն ալ Արաբի (Քոբանի) տարածք։