Գերմանացի նախկին պատգամավորը մեղավոր է ճանաչվել փողի դիմաց ԵԽԽՎ-ում Ադրբեջանի շահերը պաշտպանելու համար

Գերմանացի նախկին պատգամավորը մեղավոր է ճանաչվել կոռուպցիայի գործով. նա ԵԽԽՎ-ում առաջ է մղել Ադրբեջանի շահերը և դրա դիմաց տասնյակ հազարավոր եվրո ստացել։

Մյունխենի դատարանը մեկ տարի և երկու ամիս պայմանական ժամկետ է նշանակել Քրիստոնեա-դեմոկրատական միություն կուսակցությունից Բունդեսթագի նախկին անդամ Աքսել Ֆիշերի համար: Դատարանն արգելել է Ֆիշերին երկու տարվա ընթացքում ընտրվել պետական պաշտոններում, ինչպես նաև պարտավորեցրել է նրան 12 հազար եվրո վճարել հանցագործության զոհերի աջակցությամբ զբաղվող կազմակերպությանը:

Ֆիշերը և նրա փաստաբանը մինչև վճիռը հերքել են մեղադրանքները՝ պնդելով, որ քաղաքական գործչի և Ադրբեջանի ներկայացուցիչների միջև ոչ մի անօրինական հարաբերություն չի եղել։

Եվրոպայի խորհրդի խորհրդարանական վեհաժողովում քաղաքական գործիչն աշխատել է 2010-2018 թվականներին: