ԱՄՆ-ում ձնաբքի զոհերի թիվը հասել է 51-ի. AP

Associated Press-ը, հղում անելով տեղական իշխանություններին, հաղորդում է, որ ԱՄՆ մի քանի նահանգում ուժեղ ձնաբքի և ծայրահեղ ցրտի հետևանքով առնվազն 51 մարդ է մահացել։

Զոհվածների թվում են Տեխասում սառույցի տակ ընկած 3 երեխա, ինչպես նաև 10 մարդ Նյու Յորքի փողոցներում։ Գործակալության տվյալներով՝ միջադեպերը հանրային քննարկումներ են առաջացրել քաղաքային վարչակազմի գործողությունների, մասնավորապես՝ խոցելի բնակչությանը պաշտպանելու համար քաղաքապետ Զոհրան Մամդանիի ձեռնարկած միջոցառումների վերաբերյալ։

Երեքշաբթի երեկոյան առանց էլեկտրամատակարարման են մնացել ավելի քան 448 հազար բնակելի տներ և ձեռնարկություններ, անջատումների կեսից ավելին գրանցվել են Թենեսի ու Միսիսիպի նահանգներում:

ԱՄՆ ազգային օդերևութաբանական ծառայությունն ուրբաթ և շաբաթ օրերին երկրի արևելյան մասում կանխատեսում է արկտիկական ճակատի ուժեղացում։ Հանգստյան օրերին սպասվում է նոր ձմեռային փոթորիկ, ինչպես նաև ռեկորդային ցածր ջերմաստիճան հարավում, ներառյալ Ֆլորիդայում: «Որոշ շրջաններում սա կարող է լինել տասնամյակների ընթացքում ամենաերկար ցուրտ ալիքը»,- ասել է Եղանակի կանխատեսման կենտրոնը։