Փհենյանը Կորեայի ապամիջուկայնացման Սեուլի ձգտումն անիրականանալի է անվանել

ԿԺԴՀ-ի արտաքին գործերի փոխնախարար Պակ Մյոն Հոն Կորեական թերակղզու ապամիջուկայնացման՝ Կորեայի Հանրապետության ձգտումն անվանել է «անիրականանալի երազանք»: Այդ մասին հայտնել Է Կորեայի կենտրոնական հեռագրային գործակալությունը։

Նախօրեին Կորեայի Հանրապետության նախագահի աշխատակազմում հայտարարել էին, որ Հարավային Կորեայի և Չինաստանի ղեկավարները նոյեմբերի 1-ին կայանալիք գագաթնաժողովում կարող են քննարկել Կորեական թերակղզու ապամիջուկայնացման հարցը:

«Կորեայի Հանրապետությունը մինչև հիմա չի հասկանում, որ ժխտելով ԿԺԴՀ-ի՝ որպես միջուկային պետության կարգավիճակը և շարունակ կրկնելով ապամիջուկայնացում իրականացնելու մասին զառանցական երազանքը, ամբողջովին բացահայտում է իր անխոհեմությունը»,- ասել է փոխնախարարը:

Հյուսիսային Կորեայի առաջնորդ Կիմ Չեն Ընը բազմիցս ընդգծել է, որ Փհենյանը չի հրաժարվի իր միջուկային զենքից։