Վաշինգտոնը կհամաձայնի Ուկրաինային անվտանգության որևէ երաշխիք տրամադրել միայն խաղաղության համաձայնագրի կնքումից հետո. Ռուբիո

ԱՄՆ պետքարտուղար Մարկո Ռուբիոն եվրոպացի դաշնակիցներին հայտնել է, որ Միացյալ Նահանգները ցանկանում է նախ խաղաղ գործարք կնքել, իսկ հետո արդեն համաձայնեցնել Ուկրաինային անվտանգության որևէ երաշխիք տրամադրելու հարցը՝ գրում Է Politico-ն՝ վկայակոչելով եվրոպացի դիվանագետին և երկրորդ աղբյուրին:

Պարբերականի աղբյուրների համաձայն՝ այս պայմանը եղել է Կիևին ուղղված ԱՄՆ առաջարկների հիմքում վերջին շաբաթվա ընթացքում։ Նոյեմբերի 25-ին եվրոպացի առաջնորդների հետ հեռախոսազրույցի ժամանակ Ռուբիոն հայտարարել է, որ Դոնալդ Թրամփը կբանակցի Ուկրաինայի համար երկարաժամկետ անվտանգության երաշխիքների շուրջ, որոնք Կիևին կապահովեն «անվտանգության զգացում»՝ հաղորդում է Politico-ն։

Մեկ այլ եվրոպացի դիվանագետի խոսքով՝ Ռուբիոն հայտարարել է, որ Ուկրաինայի համար անվտանգության երաշխիքները Թրամփի վարչակազմի համար առաջնահերթություն են և քննարկվում են առանձին։ Նա հավելել է, որ դրանք այն հարցերի շարքում են, որոնց շուրջ արդեն համաձայնություն է ձեռք բերվել, և ԱՄՆ-ը ցանկանում է արագ ավարտին հասցնել ամբողջ փաթեթը։

Politico-ի աղբյուրը պնդել է, որ Ռուբիոն «ընդհանուր առմամբ» նշել է այլ հարցեր, որոնք պետք է լուծվեն գործարքի կնքումից հետո, այդ թվում՝ Ուկրաինայի տարածքային ամբողջականությունը և Եվրոպայում (որոշ դեպքերում՝ Միացյալ Նահանգներում) սառեցված ռուսական ակտիվների ճակատագիրը։