Ռուսաստանի նախագահը ներկայացրել է Ուկրաինայում ռազմական գործողությունների դադարեցման պայմանը

Ուկրաինայի զինված ուժերը կա՛մ դուրս կգան իրենց կողմից գրավված տարածքներից, կա՛մ ռուսական բանակը դրան կհասնի ուժով: Ռուսաստանի նախագահ Վլադիմիր Պուտինը ռազմական գործողությունների դադարեցման այս պայմանը ներկայացրել է Բիշքեկում՝ ՀԱՊԿ գագաթնաժողովից հետո տեղի ունեցած մամուլի ասուլիսի ժամանակ:

Պուտինը հաստատել է, որ ամերիկյան պատվիրակությունը նախատեսում է ժամանել Մոսկվա հաջորդ շաբաթվա առաջին կեսին: «Ռուսաստանը պատրաստ է համագործակցել Միացյալ Նահանգների հետ՝ ռազմավարական կայունության բոլոր հարցերը լուծելու համար և ԱՄՆ-ի հետ բանակցություններում կբարձրացնի միջուկային փորձարկումների նախապատրաստման հարցը»,- հայտարարել է ՌԴ նախագահը:

Նա հատուկ մեկնաբանել է Ուկրաինայի հետ բանակցությունների վերաբերյալ հայտարարությունները՝ ասելով, որ «գոյություն չունի որևէ պայմանագրի նախագիծ», կա միայն «քննարկվող հարցերի փաթեթ»: Նրա խոսքով՝ ԱՄՆ-ի առաջարկած ծրագիրը պետք է «ներկայացվի դիվանագիտական ​​լեզվով»:

Պուտինը նաև հայտարարել է, որ Ռուսաստանը պատրաստ է Արևմուտքի հետ քննարկել եվրոպական անվտանգության ու ռազմավարական կայունության հարցերը և սուտ ու անհեթեթ է համարել Եվրոպայի վրա Ռուսաստանի հարձակման մասին պնդումները:

Նա ընդգծել է, որ Մոսկվան պատրաստ է «պաշտոնապես արձանագրել», որ մտադիր չէ հարձակվել Եվրոպայի վրա:

Պուտինն անդրադարձել է նաև ՀԱՊԿ-ի նիստերին Հայաստանի բացակայությանը: Խոսելով այդ կառույցի շրջանակներում համագործակցության մասին՝ նա ընդգծել է, որ Ռուսաստանը պահպանում է կապը Հայաստանի հետ՝ չնայած կազմակերպության նիստերին չմասնակցելու Երևանի որոշմանը։ «Դա նրանց ընտրությունն է։ Մենք գիտենք Հայաստանի դիրքորոշումը, նրանք իրենց համարում են կազմակերպության անդամ, բայց առայժմ ձեռնպահ են մնում մասնակցությունից»,- ասել է նա։