Հոնկոնգի բնակարանային համալիրում բռնկված հրդեհն ամենամեծն է վերջին 17 տարում

Հոնկոնգի ութ բարձրահարկ շենքերից բաղկացած բնակարանային համալիրում բռնկված հրդեհի զոհերի թիվը հասել է 13-ի, ևս 28-ը վիրավորվել են, հաղորդել է South China Morning Post-ը։

Պարբերականի համաձայն՝ դա Հոնկոնգում վերջին 17 տարվա ամենամեծ հրդեհն է։ Associated Press-ի տվյալներով՝ հրդեհը բռնկվել է մի քանի բարձրահարկ շենքերում, որտեղ բնակվում է մոտ 4800 բնակիչ։ Կրակը արագ տարածվել է համալիրը շրջապատող բամբուկե շինարարական փայտանյութերով։ Հրդեհը դասակարգվել է 5-րդ մակարդակի՝ բարդության ամենաբարձր աստիճանի։ Դեպքի վայր են ժամանել 128 հրշեջ և շտապօգնության 57 մեքենա։ Տարածքից տարհանվել է մոտ 700 մարդ։

Հրդեհի պատճառը դեռևս անհայտ է, սակայն South China Morning Post-ը նշում է, որ շենքի բնակիչները վաղուց բողոքում են աշխատանքի ժամանակ շինարարների ծխելուց։