ԱՄՆ-ը Հունգարիային հանել Է ՌԴ-ի դեմ պատժամիջոցների ցուցակից. Սիյարտո

ԱՄՆ նախագահ Դոնալդ Թրամփը Հունգարիային ազատել է ռուսական նավթի գնման դեմ սահմանված ԱՄՆ պատժամիջոցներից՝ ուրբաթ՝ նոյեմբերի 7-ի երեկոյան հայտարարել է Հունգարիայի արտաքին գործերի նախարար Պետեր Սիյարտոն։

BBC-ն տեղեկացնում է, սակայն, որ Օրբանի հետ իր բանակցությունների հրապարակային մասի ընթացքում Թրամփը չի հաստատել, որ իր վարչակազմը համաձայնել է չկիրառել երկրորդական պատժամիջոցներ ռուսական էներգամատակարարման դեմ։

Միևնույն ժամանակ, Սպիտակ տան անանուն պաշտոնյան AFP լրատվական գործակալությանը հայտնել է, որ պատժամիջոցներից ազատումը ուժի մեջ կլինի միայն մեկ տարի։

Օրբանի հետ հանդիպման ժամանակ Սպիտակ տան ղեկավարը դարձյալ դեպի ծով ելք ունեցող ԵՄ երկրներին մեղադրել է, որ շարունակում են էներգիա գնել Ռուսաստանից:

Բրյուսելը, սակայն, համաձայն չէ այդ փաստարկների հետ՝ նշելով, որ Ուկրաինայում պատերազմի մեկնարկից հետո ԵՄ-ն արգելել է ռուսական նավթ ներմուծել։ Արդյունքում, ըստ Եվրահանձնաժողովի, Ռուսաստանից ԵՄ նավթի ներմուծման մասնաբաժինը 2021 թվականի առաջին եռամսյակի 29 տոկոսից նվազել է մինչև երկու տոկոսի՝ 2025 թվականի երկրորդ եռամսյակում։

ԱՄՆ-Հունգարիա բանակցությունների արդյունքում, ըստ վարչապետ Վիկտոր Օրբանի, ամերիկյան վարչակազմը նաև համաձայնել է վերացնել Հունգարիայում Պակշ II ատոմակայանի նախագծի դեմ պատժամիջոցները։ Միացյալ Նահանգները և Հունգարիան համաձայնել են զարգացնել երկկողմ համագործակցությունը միջուկային ոլորտում։