Հոնկոնգի բնակելի համալիրում բռնկված հրդեհի զոհերի թիվը հասնում է հարյուրի

Հոնկոնգի բնակելի համալիրում բռնկված ավերիչ հրդեհի հետևանքով զոհվել է առնվազն 94 մարդ, ավելի քան 80-ը, այդ թվում 11 հրշեջ, ստացել են տարբեր աստիճանի վնասվածքներ, 4800 բնակչից մոտ 900-ին տեղափոխել են ժամանակավոր կացարաններ։ Որոնողափրկարարական գործողությունները շարունակվում են, մոտ 300 մարդ անհայտ կորած է համարվում։ Այդ մասին հայտնել են տեղական լրատվամիջոցները՝ հղում անելով արտակարգ ծառայություններին։

Հրդեհի առաջացման պատճառները դեռ քննվում են, սակայն մասնագետների կարծիքով՝ կրակն արագ տարածվել է շենքերում շինարարական աշխատանքների ժամանակ օգտագործվող դյուրավառ ցանցերի և բամբուկե փայտամածների պատճառով։

Լրատվամիջոցների հաղորդագրությունների համաձայն՝ Չինաստանի և Հոնկոնգի իշխանությունները քննություն են սկսել, ձերբակալվել է համալիրի վերանորոգման համար պատասխանատու շինարարական ընկերության երեք բարձրաստիճան պաշտոնյա՝ երկու տնօրեն և ընկերության ինժեներական խորհրդատուն։ Նրանք մեղադրվում են չկանխամտածված սպանության համար։