ԱՄՆ պլանը կարող է դառնալ խաղաղ կարգավորման հիմք․ Պուտին

ՌԴ նախագահ Վլադիմիր Պուտինը հայտարարել է, որ ԱՄՆ խաղաղության պլանը, որը ներկայացրել է Դոնալդ Թրամփի վարչակազմի կողմը, կարող է դառնալ ռուս-ուկրաինական պատերազմի խաղաղ կարգավորման հիմք։ Այդ մասին նա ասել է նոյեմբերի 21-ին՝ ՌԴ Անվտանգության խորհրդի նիստում։

Պուտինը նշել է, որ Ռուսաստանը ստացել է ԱՄՆ խաղաղության պլանի տեքստը, բայց այն «մասնագիտական մակարդակով» ռուսական կողմի հետ չի քննարկվել։ Նրա կարծիքով՝ ԱՄՆ-ը պլանը չի քննարկել ՌԴ-ի հետ, քանի որ Ուկրաինան դեռ իր համաձայնությունը չի տվել այդ առաջարկներին։

«Մենք տեսնում ենք, որ Ալյասկայում կայացած բանակցություններից հետո ամերիկյան կողմից որոշակի դադար կա։ Եվ մենք գիտենք, որ դա կապված է Ուկրաինայի՝ նախագահ Թրամփի առաջարկած խաղաղ կարգավորման պլանից փաստացի հրաժարվելու հետ։ Կարծում եմ, հենց այդ պատճառով էլ հայտնվեց դրա նոր խմբագրությունը՝ փաստացի արդիականացված պլանը՝ արդեն 28 կետով։

Մենք այդ տեքստը տեսել ենք։ Այն ստացել ենք ԱՄՆ վարչակազմի հետ գոյություն ունեցող փոխգործակցության ուղիներով։ Կարծում եմ, որ այդ պլանը նույնպես կարող է դրվել վերջնական խաղաղ կարգավորման հիմքում։ Բայց կոնկրետ, հիմնավորված ձևով մեզ հետ այդ տեքստը չեն քննարկել։ Եվ կարող եմ ենթադրել՝ ինչու։ Պատճառը, կարծում եմ, նույնն է՝ ԱՄՆ վարչակազմին մինչ այժմ չի հաջողվում ստանալ ուկրաինական կողմի համաձայնությունը։ Ուկրաինան դեմ է։

Ակնհայտ է, որ Ուկրաինան և նրա եվրոպական դաշնակիցները դեռ մնում են մոլորության մեջ և երազում են մարտի դաշտում Ռուսաստանին մատնել ռազմավարական պարտության։ Կարծում եմ, նման դիրքորոշման հիմքում ընկած է ոչ այնքան նրանց ցածր կոմպետենցիան (այժմ դրա մասին չեմ խոսի), որքան այն, որ նրանք պարզապես չունեն օբյեկտիվ տեղեկատվություն մարտի դաշտում իրական իրավիճակի մասին»,-նշել է նա։

«Սա մեր պատմության ամենադժվար պահերից մեկն է: Ուկրաինան կարող է շատ դժվար ընտրության առաջ կանգնել. կամ արժանապատվության կորուստ, կամ հիմնական գործընկերոջը կորցնելու ռիսկ, կամ դժվար 28 կետեր, կամ չափազանց դժվար ձմեռ, ամենադժվարը և հետագա ռիսկեր»,- ասել է նախագահը: