Ամերիկացի դիվանագետը ժամանել է Թուրքիա՝ Սիրիայում քուրդ զինյալների վերաբերյալ բանակցությունների համար
ԱՄՆ պետքարտուղարի քաղաքական հարցերով տեղակալի պաշտոնակատար Ջոն Բասը երկօրյա այցով ժամանել է Անկարա՝ բարձրաստիճան պաշտոնյաների հետ քննարկելու նախագահ Բաշար Ասադի ռեժիմի անկումից հետո Սիրիայում ստեղծված խնդիրները՝ գրում է Hurriyet-ը: Մասնավորապես, ուշադրության կենտրոնում է Սիրիայի հյուսիսում Քրդական ինքնապաշտպանական ուժերի (YPG) ներկայության հարցը։
Պարբերականը հիշեցնում է, որ այցը տեղի է ունենում այն ժամանակ, երբ Անկարան խստացրել է իր հռետորաբանությունը YPG-ի դեմ, որը Թուրքիայի ղեկավարությունը համարում է ահաբեկչական կազմակերպություն։
Թուրքիայի պաշտպանության նախարարությունում պարբերականի աղբյուրները հայտարարել են, որ թուրք զինվորականները պատրաստ են շարունակել ռազմական գործողությունները սահմանակից երկրների տարածքում՝ խանգարելու YPG-ին՝ ապակայունացնել տարածաշրջանը:
Թուրքիան վեճերի մեջ է ԱՄՆ-ի և ԵՄ-ի հետ՝ YPG-ին աջակցելու հարցով, որը քրդերի գլխավորած «Սիրիայի դեմոկրատական ուժերի» հիմնքն է: Անկարան YPG-ին համարում է Թուրքիայի, ԱՄՆ-ի և ԵՄ-ի կողմից ահաբեկչական ճանաչված Քրդստանի աշխատավորական կուսակցության (PKK) մաս: Մինչդեռ ո՛չ ԱՄՆ-ը, ո՛չ ԵՄ-ն YPG-ին չեն ճանաչում որպես ահաբեկչական կառույց:
