Ռուսական կողմը Երևանին և Բաքվին չի դրդում հապճեպ հաշտության պայմանագիր կնքել. Լավրով
Ռուսական կողմը Երևանին և Բաքվին չի դրդում հապճեպ հաշտության պայմանագիր կնքել՝ РИА Новости գործակալության հետ հարցազրույցում հայտարարել է ՌԴ ԱԳ նախարար Սերգեյ Լավրովը: Նրա խոսքով՝ կարգավորման հարցում առաջընթացի հասնելու համար պահանջվում են էական ջանքեր և երկար ժամանակ:
«Այդ պատճառով էլ, ի տարբերություն արևմտյան կեղծ միջնորդների, գործընկերներին չենք դրդում հապճեպ հաշտության պայմանագիր կնքել»,- նշել է Լավրովը՝ հավելելով՝ Ռուսաստանը շահագրգռված է Հարավային Կովկասում խաղաղությամբ և կայունությամբ:
ՌԴ ԱԳ նախարարը նշել է նաև, թե ԱՄՆ-ը և ԵՄ-ն փորձում են գործընթացից դուրս մղել Ռուսաստանին: Լավրովը հերթական անգամ հայտարարել է՝ Մոսկվան կողմ է, որ տարածաշրջանի խնդիրները լուծվեն տարածաշրջանի երկրների կողմից:
«Ռուսաստանը պատրաստ է, ինչպես և նախկինում, գործընկերային աջակցություն ցուցաբերել Բաքվի և Երևանի միջև բանակցությունների հաջող ավարտի համար՝ Ռուսաստանի, Ադրբեջանի և Հայաստանի ղեկավարների 2020-2022 թվականների եռակողմ պայմանավորվածությունների հիման վրա այն ձևով ու ծավալով, որոնք պահանջված կլինեն երկու բանակցողների կողմից»,- ասել է ՌԴ արտգործնախարարը:
