Կայացել է Հայաստանի և Վրաստանի խորհրդարանների արտաքին հարաբերությունների հանձնաժողովների համատեղ նիստը
Սեպտեմբերի 2-ին տեղի է ունեցել է ՀՀ ԱԺ արտաքին հարաբերությունների մշտական հանձնաժողովի և Վրաստանի Խորհրդարանի արտաքին հարաբերությունների հանձնաժողովի համատեղ երկրորդ նիստը:
Ողջունելով Հայաստան ժամանած վրացի գործընկերներին` ՀՀ ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը կարևորել է 2022 թվականի նոյեմբերին համատեղ ստորագրված համագործակցության հուշագրի համաձայն` երկու երկրների խորհրդարանների արտաքին հարաբերությունների հանձնաժողովների միջև նիստերի անցկացումը:
Կողմերն արժևորել են երկու երկրների վարչապետների կողմից ռազմավարական գործընկերության մասին համագործակցության համաձայնագրի ստորագրումը:
«Թե՛ օրենսդիր և թե՛ գործադիր մակարդակներում հարաբերությունների դինամիկան ցույց է տալիս, որ մենք գնում ենք ճիշտ ճանապարհով: Վերջին տարիներին ակտիվացել են միջգերատեսչական կապերը, խորհրդարանական համագործակցությունը»,- շնորհակալություն հայտնելով ջերմ ընդունելության համար` նշել է Վրաստանի խորհրդարանի արտաքին հարաբերությունների հանձնաժողովի նախագահ Նիկոլոզ Սամխարաձեն:
Պատգամավորները ներկայացրել են Հայաստանի և Վրաստանի ընթացիկ քաղաքական ու տնտեսական իրավիճակը, խոսել Եվրոպական միության հետ սերտ համագործակցությունից: Սարգիս Խանդանյանն անդրադարձել է Հայաստանի և Ադրբեջանի միջև հարաբերությունների կարգավորման գործընթացի վերջին զարգացումներին, տարածաշրջանում երկարատև կայունության ապահովման հարցում ընդգծել խաղաղության պայմանագրի կնքման կարևորությունը: Շեշտվել է տարածաշրջանի բոլոր պետությունների` միմյանց տարածքային ամբողջականությունը ճանաչելու կարևորությունը:
ՀՀ ԱԺ և Վրաստանի խորհրդարանի արտաքին հարաբերությունների հանձնաժողովների համատեղ հաջորդ նիստը կանցկացվի Թբիլիսիում:
Հայկական կողմից նիստին մասնակցել են ՀՀ ԱԺ արտաքին հարաբերությունների մշտական հանձնաժողովի անդամներ Մարիա Կարապետյանը, Լենա Նազարյանը և Հռիփսիմե Գրիգորյանը, վրացական կողմից` Վրաստանի խորհրդարանի արտաքին հարաբերությունների հանձնաժողովի նախագահի տեղակալ Մարիամ Լաշխին, հանձնաժողովի անդամներ Իրակլի Մեզուրնիշվիլին, Խաթիա Ծիլոսանին:
