ՑԱՀԱԼ-ը հայտարարել է «մարտավարական դադարների» մասին՝ Գազայի հատվածում մարդասիրական օգնությանն աջակցելու համար 17.06.2024 . Միջազգային
Իսրայելի պաշտպանության բանակը հայտարարել է, որ ամեն օր՝ առավոտյան 8:00-ից մինչև երեկոյան ժամը 19:00-ը, կդադարեցնի մարտական գործողությունները Գազայի հիմնական ճանապարհներից մեկի երկայնքով՝ մարդասիրական օգնության առաքումները հեշտացնելու համար: Այսպես կոչված «մարտավարական դադարը» կսկսվի Ռաֆահի շրջանում:
Ըստ զինվորականների՝ դադարը համակարգվում է ՄԱԿ-ի և միջազգային աջակցության գործակալությունների հետ:
Իսրայելի վարչապետ Բենիամին Նեթանյահուն դատապարտել է զինվորականների այդ որոշումը՝ այն համարելով անընդունելի: ABC News հեռուստաալիքին անանուն աղբյուրը հայտնել է, որ Նեթանյահուն նախապես տեղեկացված չի եղել այդ որոշման մասին:
Զինվորականների քայլը քննադատել է նաև Իսրայելի ազգային անվտանգության նախարար Բեն-Գվիրը: Նա հայտարարել է, որ այդ նախաձեռնությունը չի ներկայացվել նախարարների կաբինետի քննարկմանը և հակասում է կառավարության որոշմանը:
ՑԱՀԱԼ-ը ստիպված է եղել բացատրել, որ դադարը չի նշանակում Ռաֆահում գործողությունների դադարեցում: «Գազայի հատվածի հարավում հրադադարի ռեժիմ չկա, Ռաֆահում կռիվները շարունակվում են»,- Ynet-ը մեջբերել է ՑԱՀԱԼ-ի ներկայացուցչի խոսքը:
