Ճիշտ կլիներ Եռատոն նշեին. Էդուարդ Այվազյանը՝ «Անմահ գնդի» երթի մասին
![Ճիշտ կլիներ Եռատոն նշեին. Էդուարդ Այվազյանը՝ «Անմահ գնդի» երթի մասին Ճիշտ կլիներ Եռատոն նշեին. Էդուարդ Այվազյանը՝ «Անմահ գնդի» երթի մասին](https://mediaanalytic.org/wp-content/uploads/2019/04/eduard.jpg)
Aliq.ge-«Անմահ գունդ» համառուսական շարժումը ծրագրում է վաղը՝ մայիսի 9-ին Վրաստանի մեծ ու փոքր քաղաքներում, այդ թվում նաև Ախալքալաքիում և Նինոծմինդայում երթ անցկացնել:
Սամցխե-Ջավախքի Մեդիա Վերլուծական կենտրոնի ղեկավարն «Ալիք մեդիայի» հետ զրույցում ասաց, որ նպատակահարմար չի տեսնում այդ ակցիայի անցկացումը Ջավախքում, քանի որ այն ասոցացվում է Վրաստանում և մի շարք այլ երկրներում ռուսական քարոզչության հետ, չի բխում Ջավախքի հայի ազգային շահերից եւ վնասելու է խնդիրների լուծմանը. «Վրացական մամուլը, հասարակական կազմակերպությունները, իշխանություններն առանց այն էլ՝ գտնում են, որ Ջավախքում ակտիվ ռուսամետ քարոզչություն է ընթանում, ու սխալ կլինի նման ակցիա կազմակերպել: Մյուս կողմից՝ այդ օրը Վրաստանում ևս տոն է, մենք հարգում ենք մեր նախնիների հիշատակը, հիշատակի արարողություններ, իհարկե, պետք է անցկացնել, բայց ոչ ռուսական լոզունգի ներքո: Լավ կլիներ՝ Եռատոն նշեին ու մեր հերոսներին հիշատակեին»,- ասաց Էդուարդ Այվազյանը:
Նինոծմինդայի քաղաքապետարանը տեղեկացված է ակցիայի մասին, բայց կազմակերպիչներն են անհայտ, պաշտոնական նամակ են ուղարկել, որում գրված է, որ երթ է լինելու դեպի քաղաքի երկու հուշարձաններ՝ մեկը քաղաքային այգում, մյուսը՝ Խոջաբեկ թաղամասում. «Մենք տեղյակ ենք, որ ակցիա է անցկացվելու, նամակի ձևով ենք ստացել, բայց կազմակերպիչների մասին ոչինչ չգիտենք, Սլավոնական ժողովուրդների ազգային կոնգրեսի անունից է նամակը, նաև օրենքի կետերն են մեջբերված, որ Խորհրդային սիմվոլիկան արգելված է, ու չի լինելու»,- տեղեկացրեց Նինոծմինդայի քաղաքապետ Անիվարդ Մոսոյանն ու նաև ասաց, որ ոչ մի վատ բան չի տեսնում ու չի բացառում, որ իրենք ևս միանան ակցիային, եթե ժամը համընկնի:
Նինոծմինդայում տոնական միջոցառումները մեկնարկելու են ժամը 12-ին:
Ակցիայի կազմակերպիչներից միայն մեկի հետ կապ հաստատել հաջողվեց, բայց նա մեզ հորդորեց հարցերն ուղղել գրավոր՝ պաշտոնական նամակի տեսքով:
Հիշեցնենք, որ վաղը Թբիլիսիում անցկացվելու է «Անմահ գնդի» զուգահեռ ակցիան՝ «Ո՛չ Պուտինի մարշին» խորագրով: Կազմակերպիչների կարծիքով՝ «Անմահ գունդը» Պուտինի քարոզչական ռեժիմի ծրագիրն է, Կրեմլը համագործակցային ուժերը ամրապնդում է այնտեղ, որտեղ Մոսկվան շահեր ունի: Նրանք հորդորում են բոլորին առավոտյան հավաքվել Թբիլիսիի Ճավճավաձե փողոցում ու մասնակցել երթին:
ՀԵՂԻՆԱԿ`
Ալիք Մեդիա