Թրամփը կասեցրել է Կանադայի նկատմամբ 50% մաքսատուրքերը

ԱՄՆ նախագահ Դոնալդ Թրամփը հայտարարել է, որ երեք օրով կասեցրել է կանադական ապրանքների նկատմամբ 50% մաքսատուրքերը՝ սպասելով առևտրային գործարք կնքելուն։

«Ես երեք օրով կասեցրել եմ կանադական ապրանքների նկատմամբ 50% մաքսատուրքերը, որոնք պետք է ուժի մեջ մտնեին վաղը առավոտյան, քանի դեռ Կանադան և Միացյալ Նահանգները ավարտում են առևտրային համաձայնագիրը»,-գրել է Թրամփը Truth Social սոցիալական ցանցում։

Ավելի վաղ Politico պարբերականը, հղում անելով իրազեկ աղբյուրներին, հայտնել էր, որ Թրամփը քննարկում է Կանադայից ապրանքների համար 50 տոկոս մաքսատուրքերի սահմանումը հետաձգելու հնարավորությունը:

Հուլիսին ԱՄՆ նախագահը ստորագրել էր հռչակագիր, որով նախատեսվում էր լրացուցիչ 50% մաքսատուրք սահմանել Կանադայից մի շարք ապրանքների ներմուծման համար՝ գինուց մինչև հոկեյի մականներ և ցեմենտ:

Հրամանագրում նշված է, որ մաքսատուրքերը ուժի մեջ կմտնեն մեկ ամսից՝ բանակցությունները շարունակելու հնարավորություն տալու համար:

Թրամփը նաև հնարավոր է համարել նախկին նախագահ Ջո Բայդենի օրոք չեղարկված Keystone XL նավթամուղի նախագծի վերսկսումը։