Զապորոժիեի ԱԷԿ-ի պատյանի վնասն առաջացել է անօդաչու թռչող սարքից. ԱԷՄԳ

Ատոմային էներգիայի միջազգային գործակալության (ԱԷՄԳ) խումբը գրանցել է Զապորոժիեի ԱԷԿ-ի (ԶԱԷԿ) տուրբինի պատյանի արտաքին վնասը, որը, ըստ ռուսական կայանի ղեկավարության, առաջացել է անօդաչու թռչող սարքի հարվածից։ Այս մասին կիրակի՝ մայիսի 31-ին, հայտնել է ԱԷՄԳ-ի մամուլի ծառայությունը։

ԱԷՄԳ-ի տնօրեն Ռաֆայել Գրոսսիի խոսքով՝ հարվածը լուրջ միջադեպ է, որը «վտանգի տակ է դրել միջուկային անվտանգության հիմնական սկզբունքները»։ ԶԱԷԿ-ի Telegram ալիքը մայիսի 31-ին հայտնել է, որ Ուկրաինայի զինված ուժերը շարունակում են գրոհները կայանի օբյեկտների վրա։ Նշվում է, որ նոր հարվածը հասցվել է տրանսպորտային արտադրամասին։

Ռուսական կողմի տվյալներով՝ ոչնչացվել են վեց ավտոբուս և երկու «ԳԱԶել» մեքենա։ Անձնակազմի շրջանում վիրավորներ չկան։ Զապորոժիեի ԱԷԿ-ն աշխատում է բնականոն ռեժիմով։

Ուկրաինայի զինված ուժերը հերքել էին այդ տեղեկությունը՝ նշելով, որ Մոսկվան «շարունակում է Զապորոժիեի ատոմակայանն օգտագործել որպես միջուկային շանտաժի և տեղեկատվական սադրանքի գործիք»։

«Ուկրաինացի զինծառայողները գործում են բացառապես միջազգային մարդասիրական իրավունքի նորմերի շրջանակներում և հասկանում են միջուկային օբյեկտների դեմ ցանկացած գործողության հետևանքները»,- ընդգծվում է հայտարարության մեջ։