«Կամավորների կոալիցիան» ավարտել է անվտանգության երաշխիքների մշակումն Ուկրաինայի համար. Մակրոն

Ուկրաինայի նախագահ Վոլոդիմիր Զելենսկին Փարիզում քննարկումներ է անցկացրել իր ֆրանսիացի պաշտոնակից Էմանուել Մակրոնի հետ: Մի քանի ժամ տևած հանդիպման ընթացքում կողմերը բազմաթիվ հարցեր են քննարկել, սակայն ուշադրության կենտրոնում է եղել ռուս-ուկրաինական հակամարտության ավարտը և անվտանգության երաշխիքները: «Խաղաղությունը պետք է իսկապես հուսալի լինի: Պատերազմը պետք է հնարավորինս շուտ ավարտվի: Հիմա շատ բան կախված է ղեկավարների քայլերից»,- նշել է Զելենսկին:

«Կամավորների կոալիցիան» ավարտել է անվտանգության երաշխիքների մշակումը Ուկրաինայի համար։ Առաջիկա օրերին կարևոր բանակցություններ են նախատեսվում ամերիկացի պաշտոնյաների և կոալիցիայի միջև՝ ԱՄՆ-ի մասնակցությունն այդ երաշխիքներում հստակեցնելու նպատակով։ Այդ մասին հայտարարել է Ֆրանսիայի նախագահ Էմանուել Մակրոնը՝ մամուլի ասուլիսում Ուկրաինայի նախագահ Վոլոդիմիր Զելենսկու հետ։

Զելենսկին իր հերթին նշել է, որ տարածքների հարցն ամենաբարդն է։

«ԱՄՆ-ի հետ տարածքային հարցերով բանակցությունները տևեցին ամբողջ 6,5 ժամ։ Այժմ խաղաղության ծրագիրը ավելի լավ տեսք ունի»,– ասել է նա։

Ուկրաինայի նախագահը Ֆրանսիայից հետո կմեկնի Իռլանդիա: Մինչ այդ նա շնորհակալություն է հայտնել ԱՄՆ-ին և անձամբ նախագահ Դոնալդ Թրամփին պատերազմն ավարտելու գործում ակտիվորեն ներգրավվելու համար: Նոյեմբերի 30-ին ԱՄՆ-ի և Ուկրաինայի պաշտոնյաները Ֆլորիդայում բանակցությունների ժամանակ քննարկել են ռուս-ուկրաինական հակամարտության ավարտի ամերիկյան ծրագիրը: Բանակցություններից հետո պետքարտուղար Մարկո Ռուբիոն հայտարարել է` նիստն արդյունավետ էր, բայց դեռ շատ աշխատանք կա անելու: Ռուբիոյի խոսքով՝ խնդիրը միայն պատերազմի ավարտը չէ, այլև Ուկրաինայի ապագայի ապահովումը: Ումերովն իր հերթին հանդիպումը որակել էր արդյունավետ և հաջող:

Կրեմլի խոսնակ Դմիտրի Պեսկովը հայտնել է, որ դեկտեմբերի 2-ին սպասվում է Ուիթքոֆի հանդիպումը ՌԴ նախագահ Վլադիմիր Պուտինի հետ: Այս շաբաթ նաև Կիևում սպասում են ԱՄՆ նախագահի հատուկ ներկայացուցիչ Դեն Դրիսկոլին:

Միևնույն ժամանակ, ռազմական գործողությունները շարունակվում են: Ռուսական հարվածներից Դնեպրում 4 մարդ է զոհվել, 40-ը՝ վիրավորվել: Իսկ ուկրաինական հարվածներից Բելգորոդում կան 1 զոհ, 1 վիրավոր: