Ռումինիան և Չեխիան հայտնել են Ադրբեջանից աղտոտված նավթ ստանալու մասին

Ռումինիա մատակարարվող 92000 տոննա ադրբեջանական նավթը Թուրքիայի Ջեյհան նավահանգստում բեռնման ժամանակ աղտոտված է եղել օրգանական քլորիդներով: Ռումինական OMV Petrom ընկերությունը հրաժարվել է ընդունել բեռը: Այս մասին հաղորդագրություն է տարածել Ռումինիայի էներգետիկայի նախարարությունը: 

Այնուհետև ընկերությունը հրաժարվել է ընդունել 92000 տոննա նավթի ևս մեկ խմբաքանակ: Պլոեշտի քաղաքի Petrobrazi նավթավերամշակման գործարանը ստացել է 184000 տոննա պակաս նավթ: Ռումինիան արտակարգ ճգնաժամային իրավիճակ է հայտարարել, որպեսզի Էներգետիկայի նախարարությունը կարողանա ազգային պահուստներից հումք փոխանցել ձեռնարկություն և ապահովել դրա գործունեության շարունակականությունը: 

Ռումինական շուկայում վառելիքի մատակարարումը կայուն է և շարունակական։ OMV Petrom-ն անցյալ շաբաթ նավթի ներմուծման հետ կապված դժվարությունների է բախվել՝ աղտոտված նավթի փոխադրման պատճառով։ Petrobrazi վերամշակման գործարանի համար խնդրահարույց իրավիճակից խուսափելու համար մենք որոշել ենք ազգային պահուստից օգտագործել 80000 տոննա հում նավթ և 30000 տոննա դիզել»,- Facebook-ում գրել է Ռումինիայի էներգետիկայի նախարար Բոգդան Իվանը։ 

Նախարարը վստահեցրել է, որ պահուստը, որը կազմում է ավելի քան 2 միլիոն տոննա, կհամալրվի առավելագույնը 60 օրվա ընթացքում։ 

Ադրբեջանական աղտոտված նավթի մասին է հայտնել նաև Չեխիան: Տեղական լրատվամիջոցների փոխանցմամբ՝ Ադրբեջանից Չեխիա մատակարարված նավթում նույնպես հայտնաբերվել է օրգանական քլորիդի չափից ավել պարունակություն։

Աղտոտված նավթի ծավալը մոտ 60000 խորանարդ մետր է։ Թեև աղտոտման մակարդակը գերազանցում է թույլատրելի նորմերը, սակայն նավթավերամշակման գործարանի, նավթամուղի կամ երկրի ներքին մատակարարման համար վտանգ չի ներկայացնում։ Աղտոտված նավթը ժամանակավորապես պահեստավորվում է, և նախատեսվում է աստիճանաբար խառնել մաքուր հումքի հետ։