Թրամփը և Նեթանյահուն պատրաստվում են նոր վերջնագիր ներկայացնել ՀԱՄԱՍ-ին. NYT

ԱՄՆ նախագահ Դոնալդ Թրամփը և Իսրայելի վարչապետ Բենիամին Նեթանյահուն պլանավորել են նոր վերջնագիր ներկայացնել Գազայի հատվածը վերահսկող արմատական ՀԱՄԱՍ խմբավորմանը: Այս մասին հաղորդել է The New York Times (NYT)-ը:

Վաշինգտոնն ու Թել Ավիվը մտադիր են ՀԱՄԱՍ-ի հետ համապարփակ համաձայնագիր ձեռք բերել փուլային գործարքների փոխարեն։ Վերջնագրի պայմանների համաձայն՝ արմատականները պետք է ազատ արձակեն մնացած պատանդներին (առնվազն 20 մարդու)՝ իսրայելական բանտերում պաղեստինցի բանտարկյալների դիմաց, ինչպես նաև համաձայնեն պատերազմի դադարեցման պայմաններին, որոնք ներառում են զինաթափում և ապագայում պայքարի դադարեցում: Հակառակ դեպքում Իսրայելի բանակը կշարունակի ռազմական գործողությունները:

ՀԱՄԱՍ-ի ներկայացուցիչ Մահմուդ Մարդավին հայտարարել է, որ պաղեստինյան խմբավորումն արաբական միջնորդներից դեռ չի ստացել համապարփակ համաձայնագրի վերաբերյալ Իսրայելի պաշտոնական առաջարկը: Նա հավելել է, որ չնայած ՀԱՄԱՍ-ը սկզբունքորեն աջակցում է նման համաձայնագրին, այնուամենայնիվ մտադիր չէ զինաթափվել, քանի դեռ չի ստեղծվել Պաղեստին պետությունը՝ Երուսաղեմ մայրաքաղաքով։