Վուչիչը հայտարարել է Սերբիայի իշխող կուսակցության ղեկավարի պաշտոնից հեռանալու մասին
Սերբիայի նախագահ Ալեքսանդար Վուչիչը Ազգային անվտանգության խորհրդի արտահերթ նիստում խոստացել է, որ Սերբիան վճռականորեն կպաշտպանի իր ժողովրդին Կոսովոյի իշխանությունների կողմից երկրամասի մունիցիպալիտետների շենքերը գրավելու փորձերի ֆոնին:
«Սերբիայի Հանրապետությունն ուժեղ և անսասան կլինի իր ժողովրդի պաշտպանության գործում»,- ընդգծել է Վուչիչը: Ավելի վաղ նախագահի հրամանով Սերբիայի զինված ուժերը բերվել են մարտական պատրաստության վիճակի։
Բացի դրանից՝ Վուչիչը հայտարարել է իշխող Սերբական առաջադիմական կուսակցության ղեկավարի պաշտոնից հեռանալու մասին և առաջարկել Հանրապետության պաշտպանության նախարար Միլոշ Վուչևիչի թեկնածությունը:
«Նա բոլորից լավ գիտի, թե ինչ է կուսակցությունը։ Գիտեմ, թե ինչպես է նա սիրում Սերբական առաջադիմական կուսակցությանը: Շնորհակալություն այս 11 տարիների համար: Ես աշխարհի ամենահպարտ մարդն եմ այն պահից ի վեր, երբ գլխավորել եմ Սերբական առաջադիմական կուսակցությունը»,- ասել է Վուչիչը:
Կոսովոյում լարվածությունը կտրուկ սրվել է, երբ Հյուսիսային Միտրովիցայում սերբ մեծամասնության բոյկոտի պայմաններում անցկացվել են ընտրություններ, որոնց արդյունքով քաղաքապետ է ընտրվել ալբանացի Էրդեն Ատիչը: Կոսովոյի իրավապահների և սերբ ցուցարարների միջև բախումներ են տեղի ունեցել:
