Ես ճնշվողի նմա՞ն եմ, կարող եմ միայն ճնշել. Շիրակ Թորոսյանը՝ Արմեն Աշոտյանին

Armtimes.com-«Հայկական ժամանակ»-ն այսօր հրապարակել է պատգամավորների ցանկ, ովքեր համաձայն են վարչապետ Նիկոլ Փաշինյանի հետ, որպեսզի դեկտեմբերին անցկացվեն ԱԺ արտահերթ ընտրություններ: Ի դեպ, նրանց մի մասը ՀՀԿ խմբակցության պատգամավորներ են, որոնք մայիսի 8-ից չեն համագործակցում ՀՀԿ-ի հետ: ՀՀԿ կուսակցության փոխնախագահ Արմեն Աշոտյանը քիչ առաջ լրագրողների հետ զրույցում հայտարարեց, որ այդ պատգամավորների վրա ճնշումներ են եղել, ինչն էլ հանդիսացել է պատճառ, որպեսզի նրանք կողմ լինեն այդ տեսակետին:

Թեմայի շուրջ ՀԺ-ն զրուցեց Շիրակ Թորոսյանի հետ: Նա եւս ստորագրել է այդ փաստաթղթի ներքո:

– Պարոն Թորոսյան, Արմեն Աշոտյանը վստահ է, որ պատգամավորների վրա ճնշում է եղել, ինչի պատճառով էլ ստորագրել եք դեկտեմբերին արտահերթ ընտրությունների գնալու հայտարարության տակ: Ճի՞շտ է, ճնշու՞մ եղել է:

– Հարցրեք նրանց, ովքեր նոր են միացել, ես մայիսից արդեն միացել եմ համաժողովրդական շարժմանը: Նիկոլ Փաշինյանի առաջարկած ընտրությունների ժամկետը ինձ համար ընդունելի է:

– Իսկ այդ ստորագրահավաքն ու՞մ նախաձեռնությունն էր:

– Ստորագրությունները եղել են երեկ: Ես մայիսի 8-ից սկսած Նիկոլ Փաշինյանի գործողությունների գաղափարակիցն եմ եղել եւ իմանալով այդ մասին գնացել ու ստորագրել եմ:

– Ձեզ ո՞վ է ասել:

– Լսել եմ ու գնացել, ստորագրել եմ:

– Որտե՞ղ էր դրված այդ թուղթը:

– Այնտեղ մի տեղ դրված էր, նախաձեռնողին չգիտեմ:

– Ինչո՞ւ եք գաղտնի պահում:

– Ինձ տղաներից մեկը զանգեց, ասեց: Ես տեղյակ չեմ, գաղտնի չեմ պահում:

– Ձեզ ճնշե՞լ են, որ այդ թուղթը ստորագրեք:

– Ես մայիսի 8-ից այդ ամենի մեջ եմ, ինձ ո՞նց կարող են հոկտեմբերին ճնշեն: Ես ճնշվողի նմա՞ն եմ, կարող եմ միայն ճնշել:

– Իսկ տեղեկություն կա ստորագրողներից որեւէ մեկին ճնշե՞լ են:

– Զանգեք մյուսներին հարցրեք՝ իրենց ճնշել են, թե՝ ոչ:

Նարեկ Կիրակոսյան