Բելգիայի հայկական կազմակերպությունների համադաշնությունը իր վճռական աջակցությունն է հայտնում Ջավախքի հայերին
Վերջին օրերին Ադրբեջանը Վրաստանում հակահայկական հողի վրա ակտիվ սկսել է ապակայունացնել իրավիճակը մեր բարեկամ երկրում: Կոռումպացված եւ ավտորիտար ռեժիմ ունեցող պետությունը իրեն ենթակա լրատվամիջոցներով ու վարձու ընդդիմադիր քաղաքական գործիչների միջոցով մեծ հակահայկական ալիք է բարձրացրել Վրաստանում: Պատճառը իբր Ախալքալքի շրջանի Բուղաշեն գյուղում Արցախյան ազատամարտիկ Միքայել Ավագյանի կիսանդրու վերականգնումն է, սակայն մեր համոզմամբ իրականում Ադրբեջանական պետությունը լուրջ ծրագիր ունի լարվածություն ստեղծելու հայաշատ Ջավախքում:
Այս նպատակով Ադրբեջանի ավտորիտար ռեժիմը չբավարարվելով վարձու լրատվամիջոցների եւ քաղաքական գործիչների ակտիվ հակահայկական հիստերիայով իր վտանգավոր խաղերի մեջ է ներգրավել նաեւ Վրաստանի ադրբեջանական համայնքին:
Փետրվարի 8-ին Թբիլիսիի խորհրդարանի դիմաց տեղի ունեցած ադրբեջանցիների հակահայկական ցույցը Վրաստանի իշխանություններից պահանջում էր ապամոնտաժել Միքայել Ավագյանի կիսանդրին եւ դրանով իսկ լուրջ լարվածություն ստեղծել Ջավախքում: Ադրբեջանի նպատակը իրականում ոչ թե ազատամարտիկի կիսանդրու ապամոնտաժումն է, այլ տվյալ թեմայի շուրջ հայ-վրացական բախում հրահրելը:
Այդ իսկ պատճառով Բելգիայի հայկական կազմակերպությունների համադաշնությունը կոչ է անում Վրաստանի իշխանություններին եւ բարեկամ ժողովրդին պահպանել եվրոպական արժեքները եւ չտրվել ավտորիտար Ադրբեջանի ու իրեն ենթակա ուժերի սադրանքներին, որոնց նպատակը Վրաստանի ապակայունացումն է:
Մենք մեր վճռական աջակցությունն ենք հայտնում ջավախքահայերին եւ զգուշացնում Ադրբեջանին եւ իրեն ենթակա սադրիչ ուժերին, որ նման պահվածքի դեպքում Բելգիայի հայկական կազմակերպությունների համադաշնությունը ստիպված է լինելու դիմել բոլոր հնարավոր միջոցների զսպելու համար ադրբեջանական սադրանքները ընդդեմ Վրաստանի պետականության եւ հայ ժողովրդի:
