Ռուսաստանը շահում է Իրանի շուրջ զարգացումներից. Կալաս

Եվրամիության առաջնորդները հավաքվել են Բրյուսելում՝ քննարկելու իրավիճակը Մերձավոր Արևելքում և Ուկրաինայում: ԵՄ դիվանագիտության ղեկավարը հայտարարել է, որ Ռուսաստանը շահում է Իրանի շուրջ զարգացումներից:

«Ուստի այս պատերազմը դադարեցնելը կարևոր է նաև Ուկրաինայի համար»,- շեշտել է Կայա Կալասը։

Ֆրանսիայի նախագահն էլ համոզմունք է հայտնել, որ Եվրոպան պետք է հզորացնի ռազմական արտադրությունը և տրամադրի Ուկրաինայի համար նախատեսված 90 միլիարդ եվրոյի վարկը։

«Ես պարբերաբար զրուցում եմ Հունգարիայի վարչապետ Վիկտոր Օրբանի հետ և ընդգծում Ուկրաինային աջակցելու կարևորությունը»,- հավելել է Էմանուել Մակրոնը։

Մինչդեռ Օրբանը նախազգուշացրել է, որ Բուդապեշտը շարունակելու է կասեցնել ԵՄ կառույցներում Ուկրաինայի հետ կապված ցանկացած որոշում, քանի դեռ Կիևը խանգարում է «Դրուժբա» խողովակաշարով ռուսական նավթի մատակարարմանը Հունգարիա:

Ավելի վաղ Եվրամիությունն Ուկրաինային ֆինանսական և տեխնիկական աջակցություն էր առաջարկել «Դրուժբայով» Հունգարիա և Սլովակիա մատակարարումները վերականգնելու համար: Կիևը համաձայնել է։