Ռուսաստանի դեմ ԱՄՆ նոր պատժամիջոցները պատրաստ են. Քելոգ

Ռուսաստանի դեմ ԱՄՆ-ի նոր պատժամիջոցները պատրաստ են։ Նման վստահություն է հայտնել ԱՄՆ նախագահի Ուկրաինայի հարցով հատուկ դեսպանորդ Քիթ Քելոգը:

«Գրեհեմի հետ խոսել եմ շաբաթավերջին, և կարծում եմ «2025 թվականի Ռուսաստանի դեմ պատժամիջոցների մասին օրենքը» պատրաստ է»,- նրա խոսքը մեջբերել է Fox News-ը:

Օրինագիծը հովանավորել են Հարավային Կարոլինայից հանրապետական ​​սենատոր Լինդսի Գրեհեմը և Կոնեկտիկուտից դեմոկրատ սենատոր Ռիչարդ Բլումենթալը: Խոսքը 500 տոկոս մաքսատուրքերի մասին է այն երկրների ապրանքների համար, որոնք ռուսական նավթ, գազ, ուրան և այլ ապրանքներ են գնում։

Ուկրաինայի նախագահ Վոլոդիմիր Զելենսկին ավելի վաղ կոչ էր արել ԱՄՆ նախագահ Դոնալդ Թրամփին հաստատել Ռուսաստանի դեմ նոր խիստ պատժամիջոցները՝ Մոսկվային լիակատար հրադադարի մղելու համար: Ուկրաինայի նախագահը հույս է հայտնել, որ պատժամիջոցների նոր փաթեթը մոտ ապագայում կընդունվի ԱՄՆ Կոնգրեսում, որից հետո փաստաթուղթը պետք է հաստատի Սպիտակ տան ղեկավարը։