Խորհրդարանում մեկնարկել է Ժողովրդական պաշտպանի թեկնածուների լսումները |
Խորհրդարանում մեկնարկել է Ժողովրդական պաշտպանի թեկնածուների լսումները: Այս պահին Մարդու իրավունքների պաշտպանության կոմիտեի նիստում ունկնդրում են Անա Աբաշիձեին, որին խորհրդարանին են ներկայացրել ընդդիմադիր կուսակցությունները։
Անա Աբաշիձեն իր գործունեության մասին տեղեկություններ է հաղորդում պատգամավորներին։
Ընթացակարգի համաձայն՝ Ժողովրդական պաշտպանի թեկնածուների ելույթներից հետո պատգամավորները հարցեր տալու հնարավորություն կունենան։ Այսօր նիստում ծրագրված է լսել ևս երկու թեկնածուների՝ Գիորգի Բուրջանաձեին և Մարիկա Արևաձեին։
Խորհրդարան է ներկայացվել օմբուդսմենի պաշտոնի համար 19 դիմում, և պատգամավորները կլսեն բոլոր 19 դիմորդներին։
Վրաստանի Ժողովրդական պաշտպանի թեկնածուներն են՝ Անա Աբաշիձեն՝ «Գործընկերություն հանուն մարդու իրավունքների» ՀԿ-ի ղեկավար, Մարիկա Արևաձեն՝ «Արևաձե, Գոնաշվիլի և գործընկերներ» փաստաբանական գրասենյակի իրավաբան, Գիորգի Բուրջանաձե – Վրաստանի Ժողովրդական պաշտպանի տեղակալ, Լելա Գափրինդաշվիլի – «Կանանց նախաձեռնություն հանուն իրավահավասարության» ղեկավար, Սոփիո Դեմետրաշվիլի – Վրաստանի տեխնիկական համալսարանի իրավագիտության և միջազգային հարաբերությունների ֆակուլտետի դոցենտ, Թինաթին Էրքվանիա – GIPA – Վրաստանի հանրային կապերի ինստիտուտի իրավունքի և քաղաքականության դպրոցի դոցենտ, Եվգենյա Թավաձե – ժամանակավոր գործազուրկ, Ալեքսանդր Կոբաիձե – «Երիտասարդ իրավապաշտպանների ասոցիացիայի» նախագահ, Լևան Կոկորաշվիլի – Ղվարելի շրջանի երիտասարդ իրավաբանների միության խորհրդի նախագահ, Նուգզար Կոխրեիձե – «Սերունդների երկխոսություն» գիտա-ինտելեկտուալ ակումբի նախագահ, Գիորգի Մարիամիձե – «Քաղաքացիների պաշտպանության ինստիտուտի» հիմնադիր, տնօրեն, Սերգո Մախարաձե – Վրաստանի մասնագիտական միությունների միության իրավաբան, Մակա Մինդիաշվիլի – «Ժողովրդի ձայնի» հիմնադիր, Ջեմալ Նաթելաշվիլի – Վրաստանի իրավաբանների ասոցիացիայի անդամ, Նիկոլոզ Նիկոլաձե – Վրաստանի դիվանագիտական ծառայության ռեզերվ, Քեթևան Չաչավա – «Զարգացման և ժողովրդավարության կենտրոնի» գործադիր տնօրեն, Գիորգի Ցոբեխիա – կառավարիչ գործընկեր «Գիորգի Ցոբեխիա և գործընկերներ» փաստաբանական գրասենյակի տնօրեն, Յագո Խվիչիա – Վրաստանի խորհրդարանի պատգամավոր, Նազի Ջանեզաշվիլի – «Վրաստանի դատարանի հսկիչ» մարմնի տնօրեն:Այս մասին տեղեկանում ենք Վրաստանի առաջին ալիքի կայքից։
