Տարածաշրջանային զարգացման փոխնախարարը ծանոթացել է Ախալցխայում իրականացվող խոշոր ենթակառուցվածքային նախագծերին
Վրաստանի տարածաշրջանային զարգացման փոխնախարար Զազա Կվիցիանին, Ախալցխայի մունիցիպալիտետի քաղաքապետ Վարլամ Ծիկլաուրիի, պետական հանձնակատարի առաջին տեղակալ Գիորգի Քոչիաշվիլիի և քաղաքապետի առաջին տեղակալ Նոդար Տատալիշվիլիի ուղեկցությամբ, այցելել է Ախալցխա և տեղում ծանոթացել քաղաքում ընթացող կարևոր ենթակառուցվածքային ծրագրերի իրականացման ընթացքին։
Այցի ընթացքում քաղաքապետ Վարլամ Ցիկլաուրին փոխնախարարին ներկայացրել է քաղաքապետարանում իրականացվող և առաջիկայում նախատեսվող ենթակառուցվածքային նախագծերը՝ ընդգծելով դրանց նշանակությունը քաղաքի զարգացման և բնակիչների կյանքի որակի բարելավման գործում։
Պաշտոնյաներն այցելել են Ասպինձայի փողոցի թիվ 44 հասցեում կառուցվող մարզական համալիր, որտեղ շինարարական աշխատանքներն արդեն ավարտական փուլում են։ Նախագծի շրջանակում կառուցվում է ժամանակակից չափանիշներին համապատասխան համալիր՝ 300 հանդիսատեսի համար նախատեսված բասկետբոլի դահլիճով։ Նախատեսվում է նաև համալիրի հարակից տարածքի բարեկարգում, կանաչ գոտու ստեղծում և ավտոկայանատեղիի կազմակերպում։
Այցի շրջանակում փոխնախարարը ծանոթացել է նաև Ռուսթավելիի փողոցի թիվ 124 հասցեում կառուցվող կինոակումբի շինարարությանը։ Նոր մշակութային կենտրոնում կգործեն 250 տեղանոց բազմաֆունկցիոնալ դահլիճ, 50 տեղանոց կինոդահլիճ և ժամանակակից մեդիագրադարան, ինչը նոր հնարավորություններ կստեղծի քաղաքի մշակութային կյանքի զարգացման համար։
Պաշտոնյաները դիտարկել են նաև Գվարամաձեի փողոցում իրականացվող ճանապարհաշինական աշխատանքները։ Ծրագրով նախատեսված է շուրջ 1340 մետր երկարությամբ ճանապարհահատվածի ասֆալտապատում, բակային մուտքերի և ճանապարհային միացումների կառուցում, ինչը զգալիորեն կբարելավի երթևեկության պայմաններն ու ճանապարհային անվտանգությունը։
Նշվեց, որ բոլոր ենթակառուցվածքային նախագծերն իրականացվում են Տարածաշրջանային նախագծերի հիմնադրամի և տեղական բյուջեի համաֆինանսավորմամբ՝ նպատակ ունենալով շարունակաբար զարգացնել Ախալցխայի քաղաքային ենթակառուցվածքները և ստեղծել բնակիչների համար ժամանակակից, անվտանգ ու հարմարավետ միջավայր։
