Ճամայկան Միացյալ Թագավորությունից փոխհատուցում է պահանջում ստրկավաճառության համար

Ճամայկայի կառավարությունը դիմել է Միացյալ Թագավորության թագավոր Չարլզ III-ին՝ խնդրելով անդրատլանտյան ստրկավաճառության համար փոխհատուցման հայցերով հանրագիրը հանձնել գաղտնի խորհրդի Դատական կոմիտեի քննարկմանը: Այդ մարմինը բարձրագույն վերաքննիչ ատյանն է նախկին գաղութներում և պահպանում է կապը բրիտանական իրավական համակարգի հետ՝ հաղորդում է Associated Press-ը:

Պաշտոնապես դիմումն ուղարկվել է միապետին, սակայն  Չարլզ III-ը, անձնական որոշումներ չի ընդունում այդ կապակցությամբ և գործելու է բրիտանական կառավարության առաջարկությամբ։

Եթե խնդրագիրը ներկայացվի դատական կոմիտե, դատավորները պետք է որոշեն հարկադիր հեռացման օրինականության և դրա դիմաց փոխհատուցման հարցերը:

Բուքինգհեմյան պալատը հայտարարել է, որ սերտորեն համագործակցում է Ճամայկայի գեներալ-նահանգապետի հետ այդ հարցում: