«Օրեշնիկի» հարվածը միջուկային զենքի ցնցում է. Կալաս

Ռուսաստանի վերջին հարվածներն Ուկրաինային, այդ թվում՝ «Օրեշնիկ» միջին հեռահարության բալիստիկ հրթիռի կիրառումը, «միջուկային զենքի ցնցում» են, գրել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը կիրակի՝ մայիսի 24-ին, X-ում: «Ռուսաստանը փակուղի է մտել մարտադաշտում, ուստի ահաբեկում է Ուկրաինային՝ քաղաքների կենտրոններին ուղղված դիտավորյալ հարվածներով: Դրանք հրեշավոր ահաբեկչական գործողություններ են, որոնց նպատակը հնարավորինս շատ խաղաղ բնակիչներ սպանելն է»,- հայտարարել է Կալասը:

Նրա խոսքով՝ Մոսկվայի կողմից «միջուկային մարտագլխիկներ կրող Օրեշնիկ» հրթիռի կիրառումը քաղաքական սպառնալիք է և անպատասխանատու միջուկային շանտաժ:

Հրթիռն արձակվել է Աստրախանի մարզի Կապուստին Յար փորձադաշտից: Հասանելի տվյալների համաձայն՝ «Օրեշնիկ» հրթիռը կրում էր վեց մարտագլխիկ, որոնցից յուրաքանչյուրը զինված էր առանձին ենթազինամթերքով՝ ընդհանուր առմամբ 36 մարտագլխիկ։

Ռուսաստանի պաշտպանության նախարարությունը հաստատել է «Օրեշնիկ» հրթիռի օգտագործումը՝ նշելով, որ ռուսական ուժերը զանգվածային հարված են հասցրել Ուկրաինային՝ ի պատասխան Ռուսաստանում քաղաքացիական անձանց դեմ ուկրաինական հարձակումների։