Մակրոնը կրկին Անվտանգության խորհրդի նիստ է հրավիրում
Ֆրանսիայի նախագահ Էմանուել Մակրոնը կրկին հրավիրում է պաշտպանության և ազգային անվտանգության խորհրդի նիստ։ Այն կկայանա ժամը 20:15-ին՝ Փարիզի ժամանակով։
Ինչպես հայտնում է Reuters գործակալությունը՝ հղում անելով Ելիսեյան պալատին, նիստում կքննարկվի Իրանում և Մերձավոր Արևելքում ստեղծված իրավիճակը։ Նմանատիպ նիստեր անցկացվել են նաև շաբաթ և կիրակի օրերին։
Նիստից առաջ Մակրոնը հեռախոսազրույցներ է ունեցել Արաբական Միացյալ Էմիրությունների, Կատարի և Օմանի առաջնորդների հետ՝ քննարկելով տարածաշրջանային զարգացումները։
Կիրակի կայացած անվտանգության խորհրդի նիստում Ֆրանսիայի նախագահը հայտարարել էր, որ ԱՄՆ-ն և Իսրայելը Փարիզին չեն նախազգուշացրել Իրանի դեմ գործողության մեկնարկի մասին։
Նրա խոսքով՝ այժմ Ֆրանսիան ստիպված է, առաջին հերթին դիվանագիտական միջոցներով, ապահովել տարածաշրջանում գտնվող իր քաղաքացիների և ռազմաբազաների անվտանգությունը։
«Ֆրանսիան ոչ տեղեկացվել է, ոչ էլ ներգրավվել։ Ինչպես տարածաշրջանի մյուս երկրները և մեր դաշնակիցները»,- նշել է Մակրոնը՝ բացելով նիստը։
Նշվում է, որ Պարսից ծոցի և լայն Մերձավոր Արևելքի տարածաշրջանում, բացի ԱՄՆ-ից, ռազմական բազաներ և զորախմբեր ունեն նաև Ֆրանսիան, Մեծ Բրիտանիան, Ավստրալիան և մի շարք այլ երկրներ։
Հիշեցնենք՝ Միացյալ Նահանգներն ու Իսրայելը հարվածել են Իրանին: Թեհրանը պատասխան հռթիռային հարվածներ է հասցրել Մերձավոր Արևելքում գտնվող ամերիկյան ռազմական օբյեկտներին: Գործողությունը տեղի է ունեցել Իրանի միջուկային ծրագրի շուրջ բանակցությունների ձախողման ֆոնին։
Իսրայելա-ամերիկյան հարձակման հետևանքով սպանվել են Իրանի գերագույն առաջնորդ Ալի Խամենեին և բարձրաստիճան այլ պաշտոնյաներ։ Երկրում 40-օրյա սուգ է հայտարարվել:
Իրանի փոխնախագահը հայտնել է, որ գերագույն առաջնորդի պարտականությունները ժամանակավորապես կկատարեն նախագահը, դատական իշխանության ղեկավարը և Սահմանադրության պահապանների խորհրդի անդամներից մեկը:
Իսլամական հեղափոխության պահապանների կորպուսը հայտարարել է «ամենակատաղի հարձակողական գործողության» մեկնարկի մասին. ԱՄՆ նախագահը նախազգուշացրել է Իրանին՝ զերծ մնալ պատասխան հարվածներից:
Մերձավորարևելյան լարվածության ֆոնին Հայաստանի ԱԳՆ-ից հայտնում են, որ այս պահին զոհերի շրջանում ՀՀ քաղաքացիների լինելու վերաբերյալ տեղեկություններ չկան:
