Հորմուզի նեղուցով նավերի տարանցման թիվն աճում է. Al Jazeera

Վերջին օրերին Հորմուզի նեղուցով տարանցիկ նավերի թիվը փոքր-ինչ աճել է՝ հաղորդել է Al Jazeera-ն՝ հղում անելով ծովային մոնիթորինգի տվյալներին։

Իրանը թույլ է տալիս նեղուցով փոքր թվով առևտրային նավերի տարանցումը, այդ թիվն աճում է, վերջին օրերին այն գրեթե կրկնապատկվել է: Ընդ որում, խոսքն Իրանի դրոշի ներքո գտնվող նավերի մասին չէ։

Վերլուծաբանները նշել են, որ Արևմուտքի երկրների հետ կապված նավերն իրենք են փոխում երթուղիները, որպեսզի խուսափեն Հորմուզի նեղուցով անցնելուց: Այսպես, Սաուդյան Արաբիան մատակարարումներն ուղղել է Կարմիր ծովում գտնվող Յանբու էլ Բահր նավահանգիստ, ԱՄԷ-ն օգտագործում է Էլ Ֆուջեյր նավահանգիստը, իսկ Իրաքը մտադիր է նավթ արտահանել Թուրքիա տանող խողովակաշարով։

Մինչդեռ Չինաստանի, Հնդկաստանի և Իրանին բարեկամ մյուս երկրների նավերին թույլատրվում է մուտք գործել Իրանի տարածքային ջրեր։

Bloomberg-ի տվյալներով՝ Իրանը շարունակում է նավթի մատակարարումները Հորմուզի նեղուցով, որը գրեթե նույն մակարդակին է, ինչ Մերձավոր Արևելքում հակամարտության սկսվելուց առաջ: Նավթի բեռնումը Խարգում շարունակվում է: Ըստ պարբերականի՝ ԱՄՆ զինված ուժերը զանգվածային հարված են հասցրել կղզում գտնվող Իրանի ռազմական օբյեկտներին, սակայն նավթային ենթակառուցվածքները հարվածների թիրախում չեն եղել։ Արբանյակային պատկերները ցույց են տվել, որ շաբաթվա վերջին երեք նավ կանգ է առել տեղի նավթային տերմինալում։